تامر حسني يرد على محمد سامي بعد استعادة ذكرياته معه: خلتني أدمع

رد الفنان تامر حسني على رسالة الفنان محمد سامي له وتذكره ما فعله معه في بداية مشواره مع الإخراج وتعاونهما في مسلسل "آدم".
وكتب تامر حسني تعليقا على منشور محمد سامي: "يا سامي يا حبيبي يا ابن الناس الطيبين شكرا من كل قلبي على كل حرف خارج من قلبك كتبته في حقي، خلتني أدمع يا سمسم ، أولا أنا صدقت موهبتك من وانت صغير سنا لإنك فعلا موهوب موهبه مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصة يطلع عشان سنه صغير".
نشر محمد سامي صورة له برفقة تامر حسني وعلق عليها قائلاً:"ولا تنسوا الفضل بينكم" وأنا قاعد إمبارح في التصوير افتكرت الرحلة والشقي والتعب من أول عمل لحد العمل اللي بصوره دلوقتي وافتكرت صعوبة الحصول على فرصة عشان الواحد يثبت نفسة ويحقق أحلامه، فطبعا افتكرت أخويا وصاحبي الجدع الطيب الخلوق اللي دعمني من أول لحظة وكان سبب في اللي أنا فيه دلوقتي".
وتابع: "تامر قدملي كل الدعم والحب والامكانيات اللي خلتني اثبت نفسي وبالذات في وقت كان صعب الشباب ياخد في الدرامة فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا إلا هو وقف في ظهري كأنه بيحارب لأخوه وبصلي مرة والظروف كلها ضدي وكنت حاسس وانا بحضر انهم هيجيبو حد غيري وقاللي ده مسلسلك وهتعمله وهتنجح وهتنجحنا معاك، حتي طريقته المتواضعة وهو بيقوللي مسلسلك كأني عامل تسع مسلسلات قبله تحسس الواحد بنفسه وأهميته".
وأستكمل حديثه قائلاً: "أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".
إقرأ أيضا| محمد سامي يعيد ذكرياته مع تامر حسني: "خلاني أثبت نفسي"