«الإفتاء» تنصح بعدم إتمام الزواج حال وجود مشكلات صحية

قال الدكتور على فخر، أمين الفتوى بدار الإفتاء المصرية، إن الفحوصات الطبية قبل الزواج هامة للغاية، ولابد من إجرائها بشكل جيد وليس روتنيا، مضيفا: "روحوا واطمنوا على نفسكم، ممكن تعمل الفحوصات تلاقى مشكلات بسيطة تتحل، وممكن تلاقى مشكلات صحية كبيرة فنحن ننصح فقط بعدم اتمام الزواج".
وتابع أمين الفتوى بدار الإفتاء المصرية، خلال حلقة برنامج "فتاوى الناس"، المذاع على فضائية "الناس"، اليوم الأحد: "الدولة عملت ليه فحوصات ما قبل الزواج، عشان فى قاعدة شرعية بتقول لا ضرر ولا ضرار، بالتالى وجدوا أضرار صحية كبيرة بين الأزواج أو فى خلفتهم من الأطفال، وبدأ تتفاقم المشاكل وتصل إلى الطلاق بسبب هذه الأضرار الصحية، فعشان كده المشرع المصرى عمل الكشف الطبى وخلوه إلزامى عشان لو فى حاجة يعرفوا يحلوها قبل الزواج".
الزواج حقوق وواجبات
واستكمل: "لو سألنا أى زوج أو زوجة، عن الأضرار الصحية، يقولك إحنا بنحب بعض وعاوزين نتجوز، طيب بعد ما يتجوزوا والمشكلات تحصل، ايه اللى هيحصل ممكن ولا الزوج ولا الزوجة يصبروا العاطفة بتبقى غالبة، والزواج مش كله حب، لا ده فيه حقوق وواجبات، هى أو هو ميقدروش يقوموا بواجباتهم بسبب المرض، بالتالى هتحصل مشاكل فين هيكون الحب والعاطفة، طيب الأطفال هيكون عندهم مشاكل صحية كبيرة طبية بسبب الزواج ده، أنا أنصح فقط لو روحت ولوقيت مشكلات صحية لا تتم الزواج، عشان متوصلش لنهاية صعبة".
اقرأ أيضا:الإفتاء: «استفتِ قلبك» للعلماء وليس للأشخاص العادية