بعد هجوم أيمن بهجت قمر.. محمد نجاتي يتراجع: «هاخد حقي بالقانون»

تراجع الفنان محمد نجاتي، عن تصريحاته المُثيرة للجدل حول عرض سيناريوهات سيئة عليه وإعطائها لوالدته لكي تصفي عليها البطاطس.
وقال نجاتي من خلال فيديو عبر حسابه بموقع التواصل الاجتماعي "إنستجرام"،: "كان لازم أطلع وأوضح وجهة نظري في الكلام اللي اتفهم عني غلط كنت بتكلم يا جماعة عن فترة زمنية معينة اللي هي ما بعد فيلم (عرق البلح) دي كانت أواخر التسعينيات، والفترة دي كانت أفلام مقاولات وورق هابط".
وأضاف نجاتي، :"عبرت عن تعاملي مع هذا الورق بنوع من أنواع الدعابة الهزار كنت بهزر معرفش أتاخد عليا ليه أنا متربي علي إيد أساتذة كبار مثل بشير الديك ومحسن زايد وأسامة أنور عاكشة".
وتابع نجاتي: "بدأت حياتي وأنا صغير في كتابتهم، أما بخصوص الناس اللي تلفظوا بألفاظ مش هرد عليهم بتصريحات حقيرة وهجيب حقي بالقانون".
وعلق نجاتي، على الفيديو قائلا: "مفيش أحقر من اللي انت قولته ! وحقي هاخده بالقانون".
وكان محمد نجاتي قال في لقائه ببرنامج "كلام الناس" عبر قناة mbc مصر مع ياسمين عز: "السيناريو اللي مش عاجبني هيعجب غيري، وطالما أنا شايف أني مش محتاجله أو دون المستوى مش هعمله، بعد فيلم عرق البلح اتعرضت عليا سيناريوهات ومكنتش بحبها وكنت واخد جائزة أحسن ممثل في بلجيكا، لما كان بيتعرض عليا فيلم وحش كنت بخلي ماما تصفي عليه البطاطس علشان يشرب الزيت وأهين السيناريو".
وانتقد الشاعر والسيناريست أيمن بهجت قمر تصريحات الفنان محمد نجاتي في لقائه ببرنامج "كلام الناس" من تقديم ياسمين عز ويعرض عبر قناة mbc مصر.
ونشر أيمن بهجت قمر عبر حسابه على "فيسبوك"، فيديو من اللقاء والجزء الذي تحدث فيه محمد نجاتي عن رفضه لبعض السيناريوهات التي عرضت عليه وإعطاء الورق لوالدته ل"تنشف عليه البطاطس".
وكتب أيمن بهجت قمر: بيحط البطاطس في السيناريو اللي مبعوت له لو مش عاجبه عشان ماما تنشف الزيت بيه! بيهين السيناريو! برغم أني أكيد عمري ما بعت ل ده سيناريو بس بصراحة، أحقر تصريح سمعته في حياتي من واحد حاول يبقى ممثل.
وأضاف: "حقيقي يا ابني أنت تستاهل المكانة اللي أنت فيها".