لميس الحديدي توضح ل «إبراهيم عيسي» معني الشعار: ده دستورنا اللي بنحترمه

علقت الاعلامية لميس الحديدي على فوز نادي الزمالك بالدوري المصري هذا العام قائلة : "طيب الزمالك اخد الدوري السنه دي.. الف مبروك و ماله ، بالعكس المنافسه كويسه و تحفزنا و تخلينا كده نحس ان فيه منافسه أخيرا، بقي لنا سنين بتاخد البطوله بلا منافسه حقيقيه "
واشادت باداء نادي الزمالك قائلة : " لكن للموضوعيه يعني و كلمه حق برضه الزمالك لاعبيه اجتهدوا في ظروف صعبه و قدروا يحققوا البطوله بعد غياب طوبل ، انا ست بأحب المنافسه عموما لانها تحسن الأداء و تشجع الجميع، خاصه ان الكوره في مصر يعني مش في اعظم حالاتها ، مش شايفين صلاح و رونالدو و ميسي يعني .
لكن عادت وقالت عبر برنامجها " كلمة أخيرة " المذاع على شاشة " ON"قائلة : اللي عاوزه بس اعلق عليه هنا هو ليه لما فريق يكسب جمهوره يهاجم الفريق التاني، طب الزمالك اخد الدوري و احتفالات عظيمه كأنه اخد كاس العالم ماشي ، ليه بقي الهجوم ، ليه الألفاظ ، ليه ؟ احتفل بنفسك ، مالك ومال الاخرين ؟ "
ووجهت الحديدي رسالة للاعلامي إبراهيم عيسى بعد الجدل الذي اثاره خلال الساعات الماضية بعد وصفه لشعار النادي الاهلي " الاهلي فوق الجميع " بالشعار النازي قائلة : " صديقي إبراهيم عيسي قال ان جمله الأهلي فوق الجميع ده شعار نازي ، يا صديقي الزملكاوي العزيز انت عارف طبعا انها جمله قالها صالح سليم في وقت انتخابات لوقف التناحر بين المرشحين قالهم الأهلي و مصلحته فوقكم كلكم ، فوق الأهداف الفرديه ،فوق المصالح الشخصيه ، و احنا كأهلاوييه مؤمنين بهذا الشعار ، ده دستورنا اللي بنحترمه، دي مبادئ الأهلي و قيمهاللي مش بنتنازل عنها و لا علاقه لهذا الشعار ابدا بالنوادي الاخري . احنا بنتكلم عن انفسنا.الكيان عندنا فوق الجميع و فيه امثله كتيره جدا لذلك. الأهلي فوق الجميع.
واصلت : علشان كده واخدين 26 بطوله دوليه، آخرهم 10 مرات بطوله افريقيا ، 112 بطوله محليه منهم 42 مره بطوله الدوري ، نادي القرن يا جماعه عن حق. مش ناقصين بطولات ، و لكن لازم برضه نركز و نعمل صفقات افضل و نحسن الأداء و نزود المهاجمين ، ده في إطار التحسين فقط. لكننا ندعم دايما فريقنا و نسانده".