بسبب اتهام جماهير الأهلي بالنازية.. رسالة من لميس الحديدي لإبراهيم عيسى

علقت الإعلامية لميس الحديدي على فوز نادي الزمالك بالدوري المصري هذا العام قائلة: "طيب الزمالك اخد الدوري السنه دي.. الف مبروك و ماله، بالعكس المنافسه كويسة وتحفزنا وتخلينا كده نحس ان فيه منافسه أخيرا، بقي لنا سنين بتاخد البطولة بلا منافسة حقيقية".
وأشادت بأداء نادي الزمالك قائلة: "لكن للموضوعيه يعني و كلمه حق برضه الزمالك لاعبيه اجتهدوا في ظروف صعبه وقدروا يحققوا البطوله بعد غياب طوبل، انا ست بأحب المنافسه عموما لانها تحسن الأداء وتشجع الجميع، خاصه ان الكوره في مصر يعني مش في اعظم حالاتها، مش شايفين صلاح ورونالدو وميسي يعني".
لكن عادت وقالت عبر برنامجها " كلمة أخيرة " المذاع على شاشة ON: "اللي عاوزه بس اعلق عليه هنا هو ليه لما فريق يكسب جمهوره يهاجم الفريق التاني، طب الزمالك اخد الدوري و احتفالات عظيمه كأنه اخد كاس العالم ماشي ، ليه بقي الهجوم ، ليه الألفاظ ، ليه ؟ احتفل بنفسك ، مالك ومال الاخرين؟".
ووجهت الحديدي رسالة للاعلامي إبراهيم عيسى بعد الجدل الذي اثاره خلال الساعات الماضية بعد وصفه لشعار النادي الأهلي "الاهلي فوق الجميع" بالشعار النازي قائلة: "صديقي إبراهيم عيسي قال إن جمله الأهلي فوق الجميع ده شعار نازي، يا صديقي الزملكاوي العزيز أنت عارف طبعا أنها جملة قالها صالح سليم في وقت انتخابات لوقف التناحر بين المرشحين قالهم الأهلي ومصلحته فوقكم كلكم، فوق الأهداف الفرديه، فوق المصالح الشخصية، واحنا كأهلاوية مؤمنين بهذا الشعار، ده دستورنا اللي بنحترمه، دي مبادئ الأهلي وقيمتها اللي مش بنتنازل عنها ولا علاقة لهذا الشعار ابدا بالأندية الأخرى احنا بنتكلم عن انفسنا.. الكيان عندنا فوق الجميع و فيه امثله كتيره جدا لذلك. الأهلي فوق الجميع".
واصلت: "علشان كده واخدين 26 بطولة دولية آخرهم 10 مرات بطولة أفريقيا، و112 بطولة محلية منهم 42 مرة بطوله الدوري، نادي القرن يا جماعة عن حق. مش ناقصين بطولات، ولكن لازم برضه نركز ونعمل صفقات افضل ونحسن الأداء ونزود المهاجمين، ده في إطار التحسين فقط. لكننا ندعم دايما فريقنا ونسانده".