− مالك يا سى السيد شايل طاجن ستك كده وضارب بوز أديلك يومين بحالهم..خير ياخويا كفى الله الشر؟ − انتى مسمعتيش عن اللى حايعمله فينا الواتس اب يا أمينة؟ − قصدك يعنى موضوع انتهاك الخصوبية ياسى السيد؟ − اسمها انتهاك الخصوصية ياولية، فاهمة ده معناه إيه؟ − حايكون معناه يعنى إنهم حايعرفوا كل حاجة عننا؟ − آه وده عادى يعنى بالنسبالك يا أمينة؟ − ما هما كده كده عارفين كل حاجة عننا.الفيس بوك ياسى السيد عارف كل راجل وكل ست مننا بيعملوا إيه فى حياتهم..مين بيحب مراته ومين لا مين بيصرف على عياله ومين لا..حتى اللى بيهجر زوجته فى المضاجع يعرفهم نفر نفر! − قصدك مين يا أمينة ؟ − مش قصدى حد معين ياسى السيد متتخضش كده..أنا بس باضربلك مثل. − لا بس مش للدرجة دى يا أمينة. − وحياتك وأكتر من كده،طب فاكر لما كنت بقولك تعبانة يا سى السيد وعيزاك تشوفلى دكتور مباول لاسلكية؟ − الله يحظك يا أمينة مباول لاسلكية إيه تكونيش كنتى عايزة تكشفى فى السنترال،اسمها مسالك بولية ياجاهلة.هو أنا هفضل احفظهالك لغاية إمتى. − مباول ولا مسالك مش ده المهم دلوقتى المهم إنى فى نفس اليوم ده لقيت صفحة فيسبوكى مليانة أسماء وعناوين دكاترة مباول لاسلكية قصدى مسالك بولية يعنى.تقدر تقولى ده معناه إيه؟ده أنا حتى ساعتها افتكرت فيه جنى عجبه الأكونت بتاعى وسكن فيه لولا سى فهمى الله ينور بصيرته فهمنى كل حاجة،طب فاكر لما بوستنى آخر مرة يا سى السيد؟ − أنا عملت كده؟ وده كان إمتى بقى إن شاء الله؟ − ييجى كده من سنتين تلاتة يعنى قبل الكورونا دى بكتير. − اللهم طولك ياروح مالك يا ولية اخلصى انطقى حصل إيه لما اتنيلت بوستك من سنتين تلاتة! − فاكر يوميها قولتيلى مال سنانك بدأت تطلع بره بوقك كده ليه يا أمينة! − مش فاهم إيه علاقة التخاريف اللى بتقوليها دى بأن الواتس اب حينتهك خصوصياتنا؟ − عايزة أقولك يوميها انت قولتلى شكلك كده لازم تروحى لدكتور تقويم يا مونومنتى؟ − يبقى كان لازم أروح لدكتور نفسانى أطمن على عقلى! − علشان بوستنى ياسى السيد؟ − لا وعشان كمان دلعتك وقولتلك يا منمونتى! − المهم من يوميها يا سى السيد وإعلانات دكاترة التقويم بترخ على صفحتى زى النطرة يبقى إحنا متراقبين ولا لا؟ − طب فاكر لما مسكت إيدى من يومين؟ − أنا ياولية؟ ومن يومين كمان يعنى مش من زمان؟ − أيوة يا سى السيد مسكتها لما كنت بحاول افتح موبايلك..وقولتيلى مالك إيدك بقت خشنة كده ليه يا أمينة..أهو من ساعتها وصفحتى مليانة إعلانات عن كريمات ترطيب البشرة،وبعدين يا سى السيد المصريين مش بيهمهم حاجة. − قصدك إيه مش فاهم؟ − قصدى المصريين مش محتاجين حد ينتهك خصوصيتهم هم بيقولوا كل حاجة طب تصدق بالله يا سى السيد؟ − لا إله إلا الله. − إيش قولك أنا باعرف أخبار المصريين الخصوصية من السوشيال ميديا..أكلوا إيه وشربوا إيه،متخانقين ولا متصالحين..ده فيه ناس متاخدنيش يعنى لو داخلة الحمام تكتب على الفيس بوك أنها داخلة الحمام واللى مش باعرفه من السوشيال ميديا باعرفه وأنا راكبة الميكروباص ولا الأتوبيس..الناس بتتكلم عن كل أسرارها عينى عينك فلانة اتطلقت وفلانة اتخطبت ودى جوزها بيتجوز عليها عشان طلع معاش مبكر وقبضله قرشين.هىء هىء هىء ألا قولى بصحيح هى الفلوس لو جريت فى إيدك هتتغير يا سى السيد؟ − لا..انتى اللى هتتغيرى يا أمينة !
