رسالة مؤثرة من ابنة الخطيب لوالدها في عيد ميلاده

احتفلت نور الخطيب ابنة أسطورة الكرة الأهلاوية محمود الخطيب ورئيس مجلس إدارة النادي الأهلي، بعيد ميلاد والدها الذي يصادف 30 أكتوبر.
وكتبت نور عبر حسابها الشخصي بموقع التواصل الاجتماعي "فيسبوك": "قالوا عنك عايش في زمن غير زمنك، مثالي في زمن مش عايز كده، وراقي لدرجة مش مفهومة لبعض الناس، كمان بيقولوا إن في أنماط معينة من الشخصيات مش موجودة غير في الأساطير والروايات وإنها دايما من نسج خيال المؤلف ولا وجود لها في الواقع".
وتابعت: "محمود إبراهيم إبراهيم الخطيب، مجرد من أي لقب أو شهرة، في رأيي أسطورة ونموذج من البشر صعب جداً الواحد يلاقي زيه في الزمن ده، آخرنا نقرا عنه ونشوفه في الأفلام، الفرق الوحيد إنه حقيقى جداً من غير رتوش تجمل الصورة وتحليها، الصورة حلوة ومبهجة زى ما هي من 66 سنة ولمليون سنة جاية".
وأتمت: "كلامى عليك مش ممكن يخلص، ومشاعرى وأنا بحكى عنك لنفسى وللناس أحلى من أي حاجة ممكن تتوصف، أنا بحب إنى بنتك، وبرغم المعافرة إنى أتعايش مع حاجات كتير عكس اللى خدته منك، ممتنة إن المثل والمثال والقدوة حية قدامى ومخليانى أعرف أتخطى قبح الدنيا".
وقالت: "شكرًا حبيبي إنك فارس، فارس في أخلاقك وفي مشاعرك وتعاملاتك، فارس في أحكامك وحُكمك على الأمور والسيطرة عليها، فارس في خلافك وفارس في مبارزتك للغلط وإصرارك على الخير والحق، فارس في حبك وإخلاصك وإنسانيتك، فارس في إيمانك بأن العظمة لله وحده وفارس في تواضعك وقربك من الناس، كل سنة والخير والحب محاوطينك من كل مكان، وكل سنة وأنا شاكرة فضل ربنا عليّا إنى جزء من أحلى وأجمل أقداره، كل سنة وأنت فارس كل زمان".
قالوا عنك..عايش في زمن غير زمنك، مثالي في زمن مش عايز كده و راقي لدرجة مش مفهومة لبعض الناس..كمان بيقولوا إن في أنماط...
Posted by Nour El Khatib on Thursday, 29 October 2020