تامر حسني يحرج أحمد السقا أمام الملايين

أثارت تصريحات الفنان أحمد السقا، عن الفنان تامر حسني، بسبب أفيش فيلم «الفلوس»، حالة من الجدل الكبير، وذلك خلال لقائه مع الإعلامية وفاء الكيلاني في «السيرة».
وحرص تامر حسني، على الرد وتوضيح الأزمة التي تحدث عنها أحمد السقا، في البرنامج، وكتب عبر خاصية «story» على إنستجرام، «حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التلفزيون الجمهور الكريم بقى ليه حق إنه يفهم الصح».
وتابع: «عشان أفكرك بس، إنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم.. وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا، لأن الفيلم متباع للخارج والداخل باسم أخوك تامر حسني، وأصلًا أفيش الفيلم الرسمي نزل والناس كلها شافته وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة».
وتابع: «وأنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد، أخيراً بقى مستحيل الشركة تروج أو أنا أفوت أو أسمح باستخدام اسمك كبطل للفيلم وإنت مش فيه، لإن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا، فيبقى إحنا كدا بنضحك على الناس وضرينا الفيلم ولأن أكيد يشرفنى إن احنا نمثل مع بعض بطولة مشتركة لأنك حبيبى بجد ونجم أنا بحبه من قلبى فعلًا».
واختتم حديثه عن مشاركته بمسلسل «ولد الغلابة»: «وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا دا ضيف شرف بس وإنت عارف إن عمري ما عملتها وطلعت ضيف شرف غير ليك، دا أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالى عندى أوى أوى فوق ما تتصور، وكنت بفرح باجتهادات محبيك ومحبينى حتى لو صورتى صغيرة أو كاتبين بطولة أو ضيف شرف كل دا مش فارق لإنى جيت أخدم صديق عمرى وأتمنى أى كلام يصب في مصلحة مسلسل أخويا وينجح ويكسر الدنيا، إنت حبيبى يا أحمد وصديق عمر عشان كدا أنا مش هزعل منك معلش طولت في الكلام لإن برضو زعلك يعزّ عليا».
هذا الحديث أضطر أن يخرج السقا في صباح اليوم، ويعتذر لتامر حسني على «فيسبوك»، أمام جمهوره، "متزعلش وحقك عليا".