حل النجم أحمد السقا ضيفًا على أولى حلقات برنامج "السيرة" الذي تقدمه الإعلامية وفاء الكيلاني على قناة "dmc". كشف "السقا"، عن سبب اختلافه مع تامر حسني بسبب فيلمه الأخير "الفلوس"، قائلا: "زعلان منه عشان هو في فيلم (الفلوس) كلمني وقالي إنه عايزني أعمل معاه مشهد، وهو الحقيقة كان جاملني في مسلسل (ولد الغلابة)، وبعد ما عملتله المشهد فوجئت إن الفيلم نزل إنه بطولة تامر وأحمد السقا وصورة معاه على الأفيش، كلمته قولتله إيه اللي بيحصل ده، مرة قالي دول فانز، ومرة قال دول الشركة المنتجة، قولتله أنا معرفش حد منهم يا تامر أنا معرفش غيرك، ودي أثرت عليّا جدًا نفسيًا وفي شغلي". وسألته وفاء الكيلاني: "هل هذا الموقف أثر على علاقتك بتامر؟".. فأجاب قائلا: "مش هتأثر.. لو قابلني حاليا وقالي كلمتين حلوين الموضوع هيخلص.. لكن أنا زعلت، لأن أنا لا يمكن أعمل فيه كده، ميصحش كده، وهو كان بإيده يمنع الكلام ده، لكن اللي حصل حصل وأنا مسامحك يا تامر لكن مشاكلك كترت". ورد تامر حسني على ما قاله "السقا"، عبر ستوري "إنستجرام" قائلا: "حبيبي وأخويا وصديق العمر ونجم الدنيا كلها أحمد السقا.. كنت أتمنى أنك تكلمني بيني وبينك لو كنت زعلان من أي حاجة أو فاهم أي حاجة غلط لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التلفزيون الجمهور الكريم بقى ليه حق أنه يفهم الصح". وأضاف: "عشان أفكرك بس.. أنت كلمتني وقولتلي في خبر في موقع وعليه صورة افتراضية للفيلم وكاتبين أنك بطل في الفيلم وأنا رديت عليك أن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش أن دي الشركة المنتجة لأنها شركة كبيرة لا يمكن تعمل كده، لأن الفيلم متباع للخارج والداخل باسم أخوك تامر حسني، وأصلاً أفيش الفيلم الرسمي نزل والناس كلها شافته وأنت مش فيه ولا فيه اسمك، وكل الأبطال طالعين مرسومين، معرفش زعلك من إيه الحقيقة كان ممكن تزعل لو الكلام ده نزل على صفحتي أو صفحة الشركة المنتجة". وأضاف تامر حسني: "أنا شرحتلك ده من سنة واتكلمنا بعدها مرتين، مرة عيدت عليك في عيد ميلادك ومرة بخصوص برنامجك.. لو كنت لسة زعلان كنت هتقولي ساعتها.. الفيلم بقاله سنة يا أحمد، أخيرا بقى مستحيل الشركة تروج أو أنا أفوت أو أسمح باستخدام اسمك كبطل في الفيلم وأنت مش فيه، لأن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا فيبقي إحنا كدا بنضحك على الناس وضرينا الفيلم، ولأن أكيد يشرفني إن إحنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلاً". وتابع: "بعدين يا حج أحمد لما أنا جيتلك مسلسلك حصل اجتهادات كتير من محبينك الكرام، شوية يقولوا المسلسل بطولتنا وشوية يقولوا لا دا ضيف شرف بس، وأنت عارف إن عمري ما عملتها وطلعت ضيف شرف غير ليك.. دا أنت طلبتني آجي أصور 8 الصبح كنت عندك في نص ساعة عشان فكرة طلعت في دماغك فجأة، وجيت لأنك غالي عندي أوي أوي فوق ما تتصور.. وكنت بفرح باجتهادات محبينك ومحبيني حتى لو صورتي صغيرة أو كاتبين بطولة أو ضيف شرف، كل ده مش فارق لأني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا.. أنت حبيبي يا أحمد وصديق عمر، عشان كدا أنا اللي مش هزعل منك.. معلش طولت في الكلام لأن برضو زعلك يعز عليا". اقرأ أيضا فيديو| أحمد السقا يوجه رسالة لتامر حسني
