نشرت خبيرة التغذية العالمية دكتورة نورهان قنديل، على صفحتها الشخصية عبر موقع التواصل الاجتماعي فيس بوك، صورة تجمعها مع الفنانة القديرة رجاء الجداوى وعلقت عليها بتفاصيل هذا اللقاء الذي يؤكد رقي الجداوي في تعاملتها دائما. وكتبت قنديل: "خلينى احكلكوا حاجة تخصنى عن صورتى مع ست الهوانم الله يرحمها و يحسن ختامنا...وجع قلبى اوى فراقها و الله يكون فى عون كل اللى اتعامل معاها عن قرب... الصورة دى كانت فى مارس 2017 فى تسجيل لبرنامجها على الراديو، كانت اول حلقة ليه معاها اول ما شافتنى قالتلى شكلك صغير اوى بس كلهم بيقولولى انك شاطرة و مجتهدة و ذهنك حاضر و كلام جميل كتير اوى لدرجة كنت هعيط من الفرحة و فجأة قالتلى يلا هنسجل حلقتين.. قلتلها انا جاهزة". وتابعت:" مسكت ايدى كأنى بنتها و دخلتنى الاستوديو و كل ما حد يقابها تقوله شوف الجميلة ضيفتى فى البرنامج( و ده مش العادى من اى حد مشهور) بس مدام رجاء دى الهانم بنت الأصول الراقية ، الذوق و الحنية و الشياكة الحقيقية فى كل تصرف، وبعد التسجيل قالتلى يا دكتورة كلام مش هنساة طول عمرى... "انت جميلة من جوة، قلبك لسه نضيف و عندك قبول غريب و ذهنك حاضر و مريحة نفسيا و دى نعمة كبيرة... الدنيا صعبة و انت لسه صغيرة و اللى عندك ده هيدخلك مجالات فيها وحوش ، خليكى ذى ما انت لانك حلوة كدة... بس يا نورهان طالما قررتى تتواصلى مع الناس كلميهم عربى و بس حتى الكلام العلمى بسطيه لانك هتبقى حاجة كبيرة فى يوم و الناس مستنيه تسمعك". وكانت أميرة حسن مختار الأبنة الوحيدة للفنانة القديرة رجاء الجداوى، أعلنت وفاة والدتها بعد تواجدها لمدة 43 يومًا فى العزل الصحى لمستشفى أبو خليفة بالإسماعيلية، منذ إصابتها بفيروس كورونا المستجد "كوفيد 19"، عن عمر يناهز 82 عامًا. وكانت "الجداوى" قد أصيبت بالفيروس، وأثبتت التحاليل إيجابية إصابتها أثناء فترة تصويرها أحد المسلسلات، وتم نقلها للحجر الصحي بالإسماعيلية، وتدهورت حالتها الصحية، وتم وضعها بالعناية المركزة على جهاز التنفس الصناعي، وتوفيت متأثرة بإصابتها بالفيروس.
