ب الشلووووووووت

الروائية سالى عبد العزيز تكتب :
ب الشلوووووووووت
عندي حالة قرف..أقصد أرق من مسلسلات وبرامج رمضان السنة دي فقلت أدّي فيهم شوية شلاليت يمكن ارتاح وأعرف انام..المصيبة اني احترت ابدأ أشلّت في مين..بس اللي حاضرني حالا وطبعا لتميزه في الاستخفاف بعقولنا هو مسلسل زهرة وأزواجها اللي المفروض يكونوا أكتر من خمسة..أنا بقول يعدّوا الرجالة اللي مثلوا في التمثلية دي بالعيال الصغيرين كمان ويجوزوهم للفتاكه زهرة..يعني ازاي فات على المخرج سواق التاكسي والعيال اللي معديه في الشارع من جمبها من غير ما يقعوا بالمره في غرام البطلة غادة عبد الرازق..تيجي ازاي دا فيه تقليل لجمالها وانقاص لحقها...بس انا على ما حضرت ايام جميلة الجميلات فيرجينيا بجلالة قدرها محصلهاش اللي بشوفو بيحصل مع الجاجه زهره...والحمد لله طبعا ان القديرة الفنانة نادية الجندي انشغلت رمضان دا بدور تاريخي بتاع الملكة نازلي ودا طبعايمنع تأييفه على مزاجها كما اعتادنا في ادوارها السابقه واللي مهانش على غاده عبد الرازق تسيبنا رمضان دا من غير ما نشوف عينه من المرأه الجميلة الفتاكه فلحقتو وشقطتوا لنفسها..برافووووووو
هل يا استاذي مصطفى محرم القدير تجاهلت ان لولا اختلاف الأذواق لبارت السلع...دا حتى القدير حسن يوسف بتاريخه ولعدم اقتناعه بما يفعل انا شايفاه مكنش عارف يمثل يعيني...دا كان بيمثل التمثيل علشان يخلص وخلاص....انا بقيت بتفرج على المسلسلات علشان انقدها وخلاص مش علشان أتاثر بيها وانصهر مع المشكلة اللي بيحتويها السياق الدرامي...سياق ايه ودرامي ايه انا مش شايفه غير سياق الهبل على الشيطنه .في رمضان دا
يا اخوانا ..مشفتش ممثلة هوليودية وأظن دول محدش يختلف على جمالهم ..راحت مثلت دور كل الرجالة اللي فيه لما بيشوفوها عقلهم بيتلحس عليها لأ و كمان عندهم استعداد يبيعوا عيالهم بس يستحوذوا عليها...عيب اوي اوي والله
طب سؤال للفنانه غادة..ألا تشعرين بالخجل عندما تشاهدين نفسك في هذا الدور...طب سؤال للمخرج والمؤلف وكل اللي وقفوا في العمل دا يرقصوا يوم عيد ميلاد غاده كأعلان مشوق لينا عن المسلسل..بتبصوا في وش زوجاتكم وبناتكم ازاي بعد انتهاء كل حلقه من حلقات التمثيليه دي!!!فين السياق الدرامي..فين الهدف اللي هيفيد اللي هيتابع مسلسل زي دا..ممكن أرد...أنا شخصيا ارى ان الهدف من هذا المسلسل ان اخرج من شهر رمضان بدرس عظيم جدااااا وهو أن غاده عبد الرازق هي أجمل و أكمل امرأة على وجه الأرض وشكرا