كواليس لقاء الأمهات المثاليات بال«الرئيس السيسي»

لحظات لن تنسى ستظل راسخة في الوجدان، مشاعر امتزجت بالتوتر ودموع الفرح، عاشها اليوم الأمهات المثاليات، عند لقائهم بالرئيس عبد الفتاح السيسى، خلال احتفالية كبرى نظمتها الرئاسة للاحتفال بهم تعبيرا عن رد الجميل لهؤلاء الكادحات العظيمات أصحاب مشوار طويل من العطاء والتضحية والصبر.


في اتصال هاتفي خاص ل«بوابة أخبار اليوم» بالأمهات المثاليات بعد لقائهم بالرئيس، عبرن عن سعادتهن البالغة بهذا اللقاء، واصفين إياه بالحلم الكبير الذي طال انتظاره.


الحاجة ألماظ أبو السعود، الأم المثالية الثالثة على محافظة الفيوم، قالت: «من كتر سعادتي دموعي سبقتني، مرة أضحك ومرة أعيط حلم بالنسبالى أنى قابلت الرئيس، وقولتله ربنا يخليك لينا، وقولتله نفسى أزور بيت ربنا ياريس».


الحاجة سلوى يحيى، الأم المثالية الأولى عن محافظة الجيزة، قالت: «أنا سعيدة أوى أنى قابلت الرئيس وده فخر ليا، وشعور كبير أوى بالنسبالي، أنا من الناس اللي بتأيده من زمان أوى، ومع كل اللي بيعمله خاصة اللي عمله لولادنا من ذوي الاحتياجات الخاصة والقانون اللى بيحافظ على حقوقهم، والرئيس سألني عايزة إيه وأنا طلبت أحج».

ميرفت عبد الرؤوف، الأم المثالية الأولى على محافظة الغربية، قالت: «أنا مبسوطة جدا أنى قابلته وكانت أمنية حياتي أنى أقابله حتى من قبل ما يكون رئيس من وهو مشير، فرحتي أنى شوفته أكثر من فرحتي أنى بقيت أم مثالية، وطلبت منه أحج».

ثناء غالى بشاى، الأم المثالية الثانية على محافظة أسيوط، قالت: «فرحانة أوى أنى قابلت الريس، وأنا مكنتش متخيلة أنى هقابله طول حياتي ده تكريم من ربنا، وطلبت منه شقة تمليك فى أسيوط، وعارفة أن الرئيس مخلص فى عمله وبيحارب الفساد وبيراعي الكفاءة قبل الواسطة، ودي أهم حاجة عندنا».


نادية محمد، الأم المثالية الأولى على محافظة كفر الشيخ، قالت: «فرحانة أوى وطلبت منه ميسبناش خالص ويستمر معانا وربنا يقويه ويسترها معاه ويقدره علينا، أنا كنت قلقانة أوى وفضلت يومين مبنمش فرحانة بلقائه».


مديحة محمد، الأم المثالية الأولى عن شمال سيناء، قالت: «شعوري كنت متوترة وبقول يارب أوقف جنبه على كل اللي بيعمله ويطهرلنا مصر من الارهاب ويحفظ مصر فى عهده من كل سوء هو بيحب مصر واحنا بنحبه، وطلبت منه أنى أحج».


ثناء فهمي، الأم المثالية الأولى على محافظة دمياط، قالت: «أنا من سعادتي معرفتش أطلب منه إيه، وفرحانة أني قابلت أكبر شخصية فى البلد وسعيدة أني شوفته، وطلبت منه أن إبني يشتغل».


بدوية محمد، الأم المثالية الأولى على محافظة الدقهلية، قالت: «أنا سعيدة إنى اتكرمت قدام العالم كله من الرئيس، وسعيدة أوى برحلة كفاحي، وفرحانة علشانى وعلشان كل أم».


إيزيس عزيز، الأم المثالية الأولى على محافظة بنى سويف، قالت «مبسوطة إنى قابلته، وسلمت عليه وشكرته على كل حاجة عملها لينا، ومطلبتش منه حاجة لأنه عامل لنا كل حاجة».


ماجدة أحمد عشماوي، الأم المثالية الأولى على محافظة السويس، قالت: «أنا سعيدة جدا إنى شوفت الرئيس لأول مرة لأني من المعجبين جدا بشخصيته، وبأسلوبه فى إدارة البلد، والانجازات اللى عملها فى البلد، الطرق، المصانع، قناة السويس، وقولتله ربنا يقويك علينا يا ريس».

أمال محمد، الأم المثالية الأولى على محافظة البحر الأحمر، قالت: «شعوري ميتوصفش أنا سعيدة أوى إني شوفت الرئيس، كانت أمنية حياتي إنى أقابل الرئيس لشخصه مش لأي حاجة، وطلبت منه شقة لإبني لأنه ساكن فى شقة إيجار غالية عليه».


ثناء كامل الشافعى، الأم المثالية الأولى عن محافظة الإسماعيلية، قالت: «فرحانة أوى وربنا يخلي لينا الرئيس ويبارك فيه يارب، وعمري ما أتخيلت أني هقابله، نفسي أحج وأنهي مشوار حياتي بحاجة».


الحاجة عفاف عبد المنعم، الأم المثالية الأولى عن محافظة بورسعيد، قالت: «أنا سعيدة جدا أنى شوفته وأنا من مؤيديه بدرجة كبيرة جدا عشنا معاه في أمان، وطلبت منه أشتغل لأنها أمنية حياتي».


ماجدة راشد، الأم المثالية الأولى على محافظة البحيرة، قالت: «لم أكن أتوقع تكريمي من الرئيس عبد الفتاح السيسي، وفرحانة أوى بتكريم الرئيس ليا، وأنا سعيدة أوى بمقابلته وبحبه وبقدره، وأتمنى توفيق الرئيس فى نقل إبنى من مرسى مطروح لبنى سويف لأنه بعيد عننا وهو اللي بيراعيني».


عزة صابر، الأم المثالية الأولى على محافظة المنيا، قالت: «سعيدة أوى بتكريم الرئيس ليا، أنا منمتش من أول ما أعلنوا فوزي كأم مثالية على المحافظة، وشعوري بالفخر والتقدير بتكريم الرئيس ليا، خاصة وإني قدمت من 5 سنوات ومكسبتش، فإعادة التجربة شيء صعب كنت خايفة من عدم فوزي مرة ثانية، ولكن بعد إعلان فوزي والآن تكريمي من الرئيس حققت هدف من أهداف حياتي وكنت بسعى له من سنين، وطالبت من الرئيس أروح بيت الله الحرام، وأتمنى أن يلبي رغبتي فى القريب العاجل.


المهندسة لمياء محمد، الأم المثالية الأولي على محافظة المنوفية، قالت: «مبسوطة أوى وسعيدة بتكريم الرئيس ليا، وأنا سعيدة بالتكريم لانه بيدعو للأمل والتفاؤل ورسالة لكل أم تعبت أن ربنا هيجازيها، وأشكر جدا الرئيس وأقدره على جهده في النهوض بالدولة».

عزة أحمد السيد، الأم المثالية الأولى على محافظة الشرقية، قالت: «بحب الرئيس وبعتبره فخر للمصريين، وأنا وصلت لأقصى أحلامي اللي كنت نفسي فيها، وسعيت سنين طويلة لأحققها، و طلبت من الرئيس حج بيت الله لأنه أخر حلم يتمناه وأتمنى أن يحققه ليا».


زكية أبو الحسن، الأم المثالية الأولى على محافظة قنا، قالت «ربنا استجاب لدعائي وشوفت الرئيس كنت بصلي الفجر وبدعي أشوف الرئيس وأسلم عليه ومتوقعتش أن ربنا هيستجيب ليا وأشوفه في الحقيقة، وأنه يكرمني ويسلم عليا، فهي نعمة من ربنا حققهالي، وطلبت من الرئيس بيت صغير لأن بيتي وقع من 3 سنين وأنا ساكنة دلوقتى وفى بيت بإيجار».


دهب فرغلي، الأم المثالية الأولي على محافظة الوادي الجديد، قالت: «كانت مفاجأة ليا أن الرئيس يكرمني، مش مصدقة نفسي لحد دلوقتى، وسعيدة أوى أن ربنا كرمنى بتكريم الرئيس كان حلم وربنا حققه، فرحانة بالرئيس وبدوره العظيم اللى بيعمله في البلد، بدعي ربنا يصلح حاله وحال البلد».


وشكر باقي الأمهات، الرئيس السيسي، على انجازاته وعمله الدءوب خلال الفترة الماضية، وتمنوا له التوفيق في المرحلة القادمة، وأن يقود مصر إلي بر الأمان.