الوظيفة : مدون وناشط سياسي

الحمد لله علي كل شيء.. حتي ولو كانت البطالة من الشيء ده لانه قضاء الله نافذ ومتقدر ومحدش يقدر يعترض عليه.. وعلشان كتير مننا بيعاني من البطالة دي .. فالنصاحة بعينها والذكاء انك تقدر تغير طريقة حياتك وتفكيرك 180 درجة في اسرع وقت ممكن.. وتستفيد من كل شيء حتي ولو انت مش فاهم قوي .. وزي مابيقولوا اللي تغلب به العب به.. وده اللي قررت العب بيه علشان اغلب بقي شوية .. مااحنا طول عمرنا بنتغلب في الدنيا دي او بالأصح في البلد دي. يبقى لما تيجي الفرصة لازم نستفيد منها بأي شكل على طول.
الحكاية بدأت معايا من فترة بس للأسف كانت مبشرات أو بدايات ، لكنها زادت قوي اليومين دول لما لقيت إن الموضوع سبوبة عالية جدا .. سبوبة ازاي بقي ؟ وده إللي اتكلمت فيه مع واحد صاحبي وسألني نفس السؤال لما قلت له الفكرة وحبيته يدخل معايا في السبوبة دي . فقعدت معاه ساعة تجلي لأن فهمه بسيط واخدته واحدة واحدة وقلت له:
بعد الثورة وكل شيء بان على التليفزيون وكل واحد بدأ يخرج يتكلم عن الثورة والدولة والديمقراطية وأصبح الكل يفتي ويبدي رأيه في إللي يفهمه وإللي مايفهموش .. بس إللي شفناهم كانوا ناس اسمع عنهم في التليفزيون أو الصحافة أو على الأقل أسماؤهم بتتقال.. لكن الحال اتغير لأن كتير منهم بدأ الناس تهاجمهم والتليفزيون بطل يخلي الناس دي تظهر كتير لأنهم أكيد لهم علاقة بالفلول.. طب القنوات دي هتشتغل ازاي ؟
لازم في حد يرغي ويتكلم ..لقيت إن برامج كتير شغالة على القنوات دي بتستضيف شباب صغير في السن منهم كتير لابسين لبس غريب بيقولوا أنهم شباب الثورة وشعرهم مختلف حتى في منهم بنات بتلبس لبس غريب وتقريبا بيقولوا أنهم غير تقليديين شفت منهم واحدة امبارح لابسة ألوان غريبة وإشارب على راسها فيه كل الوان الطيف وبيتكلموا كلام كبير عن حقوق الإنسان وحاجات زي اللي كنا بنسمعها زمان عن القضايا المعاصرة والأيدلوجية وعلاقة الراديكالية بالليبرالية ومدى التعارض بينهم . كلام كبير كبير. وبيكتبوا تحت صورتهم أبو الليل الدئشوم . مدون وناشط سياسي
فأنا قررت إني اشتغل شغلانة زي دي. هي يادوب اطلعلي في مظاهرة . هصرف شوية بس مش مهم هي ديتها إيه؟ شوية ورق ولوح واكتب عليها جملة جديدة محدش قالها قبل كده زي مثلا زي (حملة عيب تتحرش في الميدان. دي الرقة والحلاوة هي النسوان ) او (عايز تبيع البلد قول ابيع . لكن هنشرب قصب مش الزعازيع).
وعلشان سمعت ان القنوات دي بتدفع كويس علشان الاعلانات ففي اليوم الواحد ممكن اطلع من القناة دي علي القناة دي اشرح الجملة واخد البريزتين وتمام التمام .
بس الواحد بردو لازم يكون طموح .. محتاجين أكتر من إننا نفضل نقول أنا مدون انا مدون محتاجين ان البلد تقنن وضعنا وتخلي المدون دي أكثر احتراما.. . الكل يحترمنا مش القنوات بس. فكرت اننا نعمل مليونية المدونين اهم مطالبها ان الوظيفة في البطاقة مدون ونسيبنا إن صحفي ومحاسب مابقتش تأكل عيش
ياااه نفسي اشوف اسمي
الاسم / البرعي الاصيل.
الوظيفة / مدون وناشط سياسي
بقلمي / وائل البحيري
Wael.wael40@hotmail.com