مش هسأل تاني مين ؟

مين يشفيني من الألم ؟
دم ابني زى لون أحمر
على العلم
هيعيش فوق رؤوسنا
بنسمعه للعدالة أحلى نغم
مين يشفينى من السقم ؟
النوم خاصم عيوني
عذب جفوني
زي بركان نار
ليله نهار
من خوفي على أمي
حرق قلبي بالحمم
***
مين يشفي قلبى من الآه ؟
ويرجع الأمن
زي النيل فى صفاه
زي صوت
يناجي الرب فى علاه
ويرجع النحل
يجمع رحيق
للإخلاص صديق
والعسل الرب حلاه
***
مين يشفينى مين ؟
يبدل حزن القلب والأنين
يكتب للإحباط نهاية
يرسم بريشة الأمل بداية
ينسج الشال
يعيد للنغم موال
يغزل من أرضنا
عمامة وطاقية
يهدينى من صنع إيديه
قفطان وجلابية
***
مين وأنا بانادي على إخواتي ؟
اكتب بالعمل
كلمة عزيمة على صفحاتي
وترجع للأعشاش طيورها
شايلة الخير
للفراخ فى بطونها
ويهدا البال وتنام عيونها
وفى الصباح
حي على الفلاح
تصحى فيها الحب لعملها
***
مين هيعيد الصوت ؟
يعد السكوت
لدوران الناعورة
ويطرد الغربان
بعد صلاة الفجر
فى باكورة
تخضر أرضنا
تبقى بالخير شحرورة
***
مين غيرنا ؟!
هيزرع أرضنا
يملا الصوامع بخيرنا
لأولادنا لاحفادنا
وعرقنا زيت للتروس
وانتاج يزيد
كل يوم بجديد
ومصر ترجع تاني
تبقى شمس الشموس
هى دايما أمنا
عايشة جوانا
بتجري فى دمنا
ايدي مع إيدك
مش هيبقى حد زينا
***
لما عن مين سألت
أنا فى نصاص الليالي
ندهت
على دم ابني ابدا ماندمت
أبدا ماحزنت
ناجيته
اوعى تخاف على أمنا
انا ياحبيبي أبدًا ماخفت
دمك روى الأمل
جدد النور فى عنينا
إنت صحيت الطيور
غردت حوالينا
انت نورت طريق بكره
بقطرات دمك ماتت الحسرة
للبناء جددت الفكرة
إيماننا ببلدنا
فى القلوب وقرا
يبقى مش هسأل تانى مين ؟
بايدينا سوا
أبدا مش هكون حزين
***