أنا في الهوي متحكم متسلط .. في كل عشق نكهة استعمار..

إذا اقتنعت بمن تعشقه فلن ترى غيره..
يشعر كل شخص في علاقة حب بحالة من الرضا، إلا أنه قد يلتفت إلى بعض الأشخاص الآخرين بحجة الإعجاب به خلقيا أو عمليا أو شكليا...إلى آخره من هذه الأمور.
و تحدث العديد من المشكلات بين الطرفين فهي تريد إعجابه بها وحدها وهو لا يرى أن هذا فيه ما يقلل منها، وهو لا يقبل على رجولته إعجابها بغيره و هي لا ترى أن هذا له علاقة بالحب.
يلجأ بعض الرجال إلى تكوين علاقات قد يكون بعضها نسائية بدافع العمل بشكل يؤذي مشاعر المرأة فهي ترى أنه يستطيع الوصول إلى ما يريد أيضا من خلال رجال ..
و قد يكوِن عدة صداقات مع أخريات غير حبيبته ظنا منه أن الصداقة شيء و الحب شيء آخر، و هي تنظر إلى الأمر بأنها لا تكفيه فالطبيعي أن تكون هي صديقته الوحيدة.
و أكدت آراء كثيرة و مقولات أكثر على أن اقتناع الشخص بمن يعشقه هو السبيل الوحيد ليجعله لا يرى غيره، و قامت بوابة أخبار اليوم برصد بعض الآراء الخاصة بهذه المقولة، فكانت الردود كالتالي :
قالت "مريم" جيتي عالجرح، أنا بحب خطيبي جداا و ارتبطنا عن قصة حب يمكن مكنتش مدة طويلة لكن حسيت إننا عرفنا بعض أوي، و هو كان ليه علاقات كتير معظمها بنات وكنت بتغاظ اوي واقول لما نتخطب الوضع هيتغير، منكرش انه بقى أفضل بس في حاجات كدة بتضايقني أوي وهو مش بيحس بيها و أنا مبحبش أتكلم فيها عشان معملش مشاكل لكن دايما أقوله منا لو مكفياك مش هتبص و لا تكلم و لا تشوف غيري، عشان كدة أنا مع المقولة دي أوي لو هو مقتنع بيا زي منا مقتنعة بيه عمره مهيشوف و لا يكلم غيري.
و ترى "منال" أن هذه المقولة صحيحة جدا، ولكن بعض الفتيات يأزمن الموقف، مشيرة إلى أن الموضوع مش حرب و لازم البنت تبقى واثقة في نفسها، يبص برة يبص جوة مش هتفرق المهم هو في الآخر اتجوز مين و بصراحة موضوع الحب ده مش مفهوم دلوقتي يعني مش مهم الحب المهم الاختيار كان من نصيب مين.
و علق "أمجد" القلب متقلب بطبعه، يعني أنا النهاردة مثلا بحب حبيبتي عشان معاملتها وأسلوبها، بكرة هي تطلع عيني و تخليني أتخنق منها و أشوف ناس غيرها و أعجب بيهم فهي اللي ممكن تجبرني أعمل كدة برغم إني كنت في الأول مقتنع بيها جدا.
"صح جدا جدا" أكدت هذا "نادية"، قائلة : لما بتحبي بجد حتى لو اللي حبتيه دا مش هو صورة فتى أحلامك وفي الغالب دا اللي بيحصل بس بتلاقي فيه حاجه بتكملك وبتكوني شايفة الحاجة دي أوي ولما بتتأكدي من حبه ليكي بتكمل الصورة اللي بتخليكي استحالة تشوفي حد غيره ولو حتى في بينكم مشاكل، من الآخر بتكملوا بعض بصفاتكم الحلوة والوحشة.
و شارك "نور" الحب مش معناه السجن المؤبد، طبيعي نتعامل مع ناس من الجنسين وده مش معناه إن الحبيب مش كامل في عين حبيبه او إنه مش مكفيه لا خالص، بس لازم يبقى في جزء من الثقة و الحرية في الحب سواء مع الحبيب أو الحبيبة الموضوع مش خنقة وسجن.