سلمى صباحي تبوح بأسرارها بعد الإفراج عنها

وجهت سلمى صباحي، الشكر لكل من تضامن معها ودعمها في محنتها بعدما أخلت النيابة سبيلها في قضية اتهامها بالنصب عبر الانترنت.
وقالت سلمى في تدوينة لها على موقع التواصل الاجتماعي "فيسبوك":"أحمدك يا ربي يا حبيبي يا سندي، وأشكر كل حد وقف معايا ورد غيبتي ودعالي وساندني".
ونشرت سلمى على حسابها، مقال بعنوان "السر" قالت فيه: " السر .. إني حسيت إن ربنا يحبني أوي ابتلاني ونصفني ..السر .. إني دقت جزء من الظلم اللي داقه أبويا .. السر .. اني كنت بشوف صمود أمي أيام وشهور لما كانوا بيعتقلوا أبويا..السر .. إن بعد 6 سنين جواز اكتشفت في أشرف حاجات جديدة وتأكد شعوري انه هدية ربنا ليا .. السر .. إن المحامين العظماء حامد جبر ومحمد منيب "عمامي" اللي أتولدت وسطيهم وكبرت قدامهم دافعوا عني بقلب الاب ولما رجعت البيت أخدوني في حضنهم وبكوا من فرحة رجوعي.. السر .. إن كل المحامين الكبار الأعزاء أصدقاء أبويا واللي يعتبروني زي بنتهم دافعوا عني متطوعين وبقلب صادق جدا .. السر.. إن المحامي المحترم خالد ابوبكر ظهر في حياتي فجأة ليلة التحقيق سمع قصتي وطلب مني أعمله توكيل عشان يقف جنبي تطوعا منه وماسابنيش لحظة ..السر.. إن صحابي الجدعان "بنات ورجاله" كانوا واقفين طول الأيام في النيابة وقدام القسم بس عشان يحسسوني إنهم جنبي ..السر .. إني اكتشفت عظمة حب الناس ودعواتهم الصادقة كانت توصلني وأنا لوحدي في الحجز ..السر.. إن ضباط قسم العجوزة كلهم باختلاف الرتب كانوا بيتعاملوا معايا "كإنسانة".. السر .. ان ملازم اول اصغر مني بكام سنه من القسم قاللي "لما كنت في ثانوي كنت بتابعك في برنامج شبابيك وأحس انك أختي أنا واثق انك بريئة"..السر .. إن رئيس ووكلاء نيابة العجوزة في منتهى الاحترام.. السر .. ان رئيس نيابة العجوزه رجل عنده ضمير مهني حقيقي بعد تحقيقات استمرت 3 ايام وبعد ما كتب مذكره تفيد اني مجني عليا ولست مدانه جه القرار بالحبس قاللي "انا بعتذرلك" ..السر .. اني لما رجعت البيت كنت مشتاقة أوي لحضن "حلم" بنتي ولما حضنتها لقيتها أتعلمت جمله جديدة "وحشتيني يا ماما"..السر.. اني عرفت قيمة سريري .. واني بعد 5 أيام من غير نوم نمت لمدة 6 ساعات فيهم البركة ولما صحيت لقيت 654 ميسد كول و 76 رسالة بيباركولي..السر.. اني لقيت اسمي "ستاتس" على الفيس بوك واكتر من 30 مقال بأقلام كبار الكتاب عني في الجرايد والافات التويتات بتدعمني..السر.. إني حسيت بوجع المظلومين..السر.. ان اكتشفت إن الظلم بيقوي ..السر.. في سبحة "الطاهر" عمر طاهر ..السر.. في الآية الكريمة "لا اله إلا أنت سبحانك إني كنت من الظالمين" اللي كتبتها على جدران الحجز عشان أي حد يدخل الحجز ده يقراها .. سحر ..السر.. اني لقيت الوقت اللي افتكرت فيه كل حاجه حلوه ربنا أكرمني بيها في حياتي ولقيت نفسي محظوظة جدا بالأهل والأصحاب والأحبة.. السر.. ان لما افتكروني دراع أبويا عشان يلووه .. لاقوني ضهره المستقيم اللي مايتحنيش .. السر.. اني افتكرت لما كان ابويا بيقعد معايا بليل في البلكونه اغنيله "حببتي من ضفايرها طل القمر" وهو يقرالي شعر من ديوان محمود درويش "لماذا تركت الحصان وحيدا" ودايما كانت تشغلني جمله في القصيدة دي عرفت معناها دلوأتي "مثلما كنت تحملني يا أبي"..ببساطه .. السر .. انك تعرف تشوف "المنحة" المستخبية في قلب "المحنه".. أحمدك يا ربي يا حبيبي يا سندي واشكر كل حد وقف معايا ورد غيبتي ودعالي وساندني ..سلمى صباحي".