سلمى صباحي: "افتكروني دراع أبويا عشان يلووه.. لاقوني ضهره المستقيم"

كشفت سلمى صباحى، عن أسرار كثيرة تأكدت منها بعد الإفراج عنها من تهمة النصب وتوظيف الأموال وقالت تحت عنوان "السر" عبر صفحتها الشخصية بموقع التواصل الاجتماعى "فيس بوك".
وكتبت في مقال لها نمشرته علي صفحتها الشخصية :"السر.. إني حسيت إن ربنا بيحبني قوي ابتلاني ونصفني ..السر.. إني دقت جزء من الظلم اللي داقه أبويا..السر.. إني كنت بشوف صمود أمي أيام وشهور لما كانوا بيعتقلوا أبويا..السر .. إن بعد 6 سنين جواز اكتشفت في "أشرف" حاجات جديدة واتأكد شعوري إنه هدية ربنا ليا".
وأضافت :"السر.. إن المحامين العظماء حامد جبر ومحمد منيب "عمامي" اللي اتولدت وسطيهم وكبرت قدامهم دافعوا عني بقلب الأب ولما رجعت البيت أخدوني في حضنهم وبكوا من فرحة رجوعي..السر.. إن كل المحامين الكبار الأعزاء أصدقاء أبويا واللي بيعتبروني زي بنتهم دافعوا عني متطوعين وبقلب صادق جدًا..السر.. إن المحامي المحترم خالد أبوبكر ظهر في حياتي فجأة ليلة التحقيق سمع قصتي وطلب مني أعمل له توكيل عشان يقف جنبي تطوعًا منه وماسابنيش لحظة".
وأكملت "صباحى" :السر.. إن صحابي الجدعان "بنات ورجاله" كانوا واقفين طول الأيام في النيابة وقدام القسم بس عشان يحسسوني إنهم جانبي ..السر.. إني اكتشفت عظمة حب الناس ودعواتهم الصادقة كانت بتوصلني وأنا لوحدي في الحجز..السر.. إن ضباط قسم العجوزة كلهم باختلاف الرتب كانوا بيتعاملوا معايا "كإنسانة"..السر.. إن ملازم أول أصغر مني بكام سنة من القسم قال لي: "لما كنت في ثانوي كنت بتابعك في برنامج شبابيك وأحس إنك أختي أنا واثق إنك بريئة".
وأضافت :"السر.. إن رئيس ووكلاء نيابة العجوزة في منتهى الاحترام.. السر.. إن رئيس نيابة العجوزة رجل عنده ضمير مهني حقيقي بعد تحقيقات استمرت 3 أيام وبعد ما كتب مذكرة تفيد إني مجني عليا ولست مدانة جه القرار بالحبس قال لي: "انا بعتذرلك"..السر.. إني لما رجعت البيت كنت مشتاقة قوي لحضن "حلم" بنتي ولما حضنتها لقيتها اتعلمت جملة جديدة "وحشتيني يا ماما".
وقالت أنها عرفت قيمة سريريها بعد 5 أيام من غير نوم، حيث نامت لمدة 6 ساعات، موضحة أنها :" لما صحيت لقيت 654 ميسد كول و76 رسالة بيباركولي".
وأضافت:" لقيت اسمي "ستاتس" على الفيس بوك وأكتر من 30 مقالا بأقلام كبار الكتاب عني في الجرايد والافات التويتات بتدعمني..السر.. إني حسيت بوجع المظلومين..السر.. ان اكتشفت ان الظلم بيقوي..السر.. في سبحة "الطاهر" عمر طاهر".
وقالت فى تدوينتها :"السر.. في الآية الكريمة "لا إله إلا أنت سبحانك إني كنت من الظالمين" اللي كتبتها على جدران الحجز عشان اي حد يدخل الحجز ده يقرأها.. سحر ..السر.. إني لقيت الوقت اللي افتكرت فيه كل حاجة حلوة ربنا أكرمني بيها في حياتي ولقيت نفسي محظوظة جدا بالأهل والأصحاب والأحبة..السر إن لما افتكروني دراع أبويا عشان يلووه.. لاقوني ضهره المستقيم اللي مايتحنيش ..
وأضافت :"السر.. اني افتكرت لما كان ابويا بيقعد معايا بالليل في البلكونه اغنيله "حببتي من ضفايرها طل القمر" وهو يقرالي شعر من ديوان محمود درويش "لماذا تركت الحصان وحيدا" ودايما كانت تشغلني جمله في القصيدة دي عرفت معناها دلوأتي "مثلما كنت تحملني يا أبي"..
ببساطة .. السر ..انك تعرف تشوف "المنحة" المستخبية في قلب "المحنة".
وختمت تدوينتها قائلة:"أحمدك يا ربي يا حبيبي يا سندي وأشكر كل حد وقف معايا ورد غيبتي ودعالي وساندني" .
يذكر أن نيابة شمال الجيزة الكلية برئاسة المستشار أيمن البابلي، المحامى العام الأول للنيابات أمرت بحبس سلمى صباحي 4 أيام جديدة على ذمة التحقيق لاتهامها في بلاغات بالنصب على المواطنين، والاستيلاء على أموالهم لاستثمارها بشركة تسوق عبر الإنترنت.
وقرر قاضي المعارضات بمحكمة شمال الجيزة الابتدائية إخلاء سبيلها بكفالة 30 ألف جنيه بدلاً من 200 ألف جنيه، في قضية اتهامها بالنصب وتوظيف الأموال.
وتظاهر عدد كبير من المحامين في هيئة دفاع سلمى صباحي أمام المحكمة احتجاجًا على قرار قاضى المعارضات بإخلاء سبيل سلمى بكفالة 200 ألف جنيه وطلبوا تخفيض مبلغ الكفالة إلى 30 ألف جنيه.
img title="سلمى صباحي: "افتكروني دراع أبويا عشان يلووه.. لاقوني ضهره المستقيم"" src="/upload/photo/gallery/15/5/640x1000/580.jpg" /