مواويل في الميدان

سىد حجاب سلسلة من أهم الأعمال المصرية الناجحة عربيا، كانت بصمة سيد حجاب موقعة عليها، ف "الليل وآخره"، و"أميرة في عابدين" وفيلم "الأراجوز"، وغيرها الكثير شهدت تميزه في كتابة الكلمة البسيطة المعبرة عن رؤي مجتمعه المصري، وفهمه للأعمال الدرامية، وتغلغله في أعماق الإبداع الدرامي ومنذ أيام قليلة كانت هناك امسية شعرية بمركز كرمة بن هانئ الثقافي بمتحف أحمد شوقي بعنوان "شعر ثورة 52 يناير"، وحضر الأمسية التي أدارها محمد عبد المطلب، مدير متحف أحمد شوقي، كل من الشاعر الكبير سيد حجاب والذي ألقي قصيدته التي حملت عنوان مواويل من الميدان كما ألقي أيضا قصيدة أخري بعنوان دقات القدر والتي أهداها إلي خفافيش الليل القديم
يقول شاعرنا الكبير في قصيدة "مواويل في الميدان "
والله زمان. يا زمان العزة والله زمان
وادي عيد قيامة بلدنا اتقام في قلب الميدان
زهرة شبابها العدالي. رجّعوا لها شبابها
بالدم حَنّوا ترابها. وهدوا عرش الجبان
يا كامب ديفيد يا أول عهد لاستسلام
كام واربعين عام عار. باسم السلام
وكان شالومهم خيانة وشوم وذل وفساد
ومهانة واستبداد. وظلم وضلام
دي ثورة شعبية يا ولاد ولّا ده مهرجان
قلعنا وش الكآبة. الفرحة مالية المكان
مينا يوضِّي أمينة. وبنيامين خَد حسين
وقاموا قداس وصلّوا سوا. وعلُّوا الأدان
الله أكبر. يا كلمة زمان قالوها الجدود
الله هو الحق. والحرية هيه الوجود
والكل في واحد. احنا. كلنا واحد
ودي عبقرية مصر. وده سر الوُجود والخلود
يا أمة قومي. وقيمي دولة مدنية
الكل إخوة ف وطن. والكل سواسية
ساعد في ساعد. وحلم الكل في واحد
أخوّة. حرية. وعدالة اجتماعية
واصحي يا جيش الوطن. يا شعب ما تنامشي
لازم فلول النظام ورموزه دي تمشي
كل اللي حاول كتير تغيير عقيدة الجيش
وكل مين خان وباع ناسنا. مايحكمشي
والقصة مش أقنعة تلبس ده. تقلع ده.!
دي عروش وطواغيت بتهوي والشعوب صاعدة
ونظام هوي راسه. باقي نِحِشُّه من ساسُه
ودي ثورة شعبية. واحنا وجيشنا إيد واحدة
والراجل الكول ابو لوك واو. وقشطة عليه
وَعَدنا بالبونبوناية. ليه لحس وعده
وبَعَت لنا ملثمين. شوف مَعْلَمة معاليه
شفيق يا راجل كفاية زهقنا من عهده
يا فلول نظام العمالة والفساد والذل
ما تطلعوش م البيبان وتخُشوا م الشبابيك
ولا بد نحاسبكو. وده رأيي ورأي الكل
والشعب لما أمر. قال القدر: شبيك
واياكو يوم تؤمروا الجيش يضرب الناس دول
تبقوا انتحرتوا بغباوة. والحساب ح يطول
زينة شباب مصر. أصفي قلوب. وأضوا عقول
علي ميعاد ويا ميلاد فجرنا المعدول
الجيش ده جيش الوطن. مش جيشكو يا باشوات
ده جيشنا. حتي ان والاكم بعض كباراته
جيشنا احنا: شعب ووطن مش جيش نظام أغوات
وموقفه حتمي ويا حبايبه. واخواته
وأغبي حاجة اللي فاكرين ناسنا بريالة
ح يسكّتونا ببزازة اسمها: لجنة!
اللجنة علي راسنا لكن ناسنا رجالة
ولا أي دستور ح يمشي إلا بمزاجنا
شرعية ايه اللي بتناقشوها يا أساتذة
دساتيركو داسوها والناس مصدر السلطات
دساتيركو واقعة سوا التفصيل أو الجاهزة
شرعية الثورة شعب وقام. علي نظام مات
وأمانة ياجيش وطنّا: اللي يطَمِّنا
مجلس رياسة يكون مدني. ودي مش مِنَّة
الشعب رب الدار. وصاحب القرار
وحكومَه كفاءات تكون منا. تأمِّنّا
وشبابنا ده اللي ما زال مرمي ورا القضبان
يطلع بعزة وكرامة. ونسجن السجّان
ونهد أُس الفساد وحُكم الاستبداد
وكل مين خان بلدنا وبالعدو استعان
والمليارات اللي سبعين. واللي ما اعرف كام
إشي عُمُولات واشي عَمالة لإسرائيل
ده مالنا إحنا. حلالنا احنا. وعليكو حرام
وح يستردوه شباب الجيل. ولاد النيل
أما اللي بيقسِّموها وهيه لسه عجين
مستعجلين ليه؟. شوية وتستوي التورتة!
دولتنا جاية وكلنا إخوة متساويين
والشعب صاحب البلد دي ومصدر السُلطة