ورثة الوطني

قبل ما »تنغرس«.. أو بالبلدي »تتشمط« ... وتروح »تنتخب«.. وترجع تغني ظلموه.. انصحك.. نصيحة لوجه الله.. أوعي تصدق.. أو يشطح خيالك ويقول لك ان »الأحزاب أو السلفيين أوالإخوان أوالائتلافات«.. أو أي حد من دول.. شاغل نفسه »بيك« أو باامك »مصر«.. لا.. يا دكتور اصحي.. العالم دي كلها، وعلشان تبقي علي نور من أولها، وتحسب حسبتك بعدها.. ماهم إلا »ورثة« غير شرعيين للمرحوم الحزب الوطني المنحل.. انحلالا.. وكلهم »طمعانين« ونفسهم يدوقوا »البيبسي« ويشموا الكولا ويتمرمغوا في »اليغمة« اللي عاش فيها »المرحوم« لغاية ما »كبست« علي مراوحه ، واوعي تفتكر.. ان »الخناقة« اللي شغالة اليومين دول علي »قانون« الانتخابات ومجلسي الشعب والشوري.. برضه علشانك ولا علشان امك »مصر«... لا ياروح .. مصر .. »دي خناقة« تقسيم الميراث.. وكل واحد منهم حيكون نصيبه كام؟.. ما تسأل نفسك كده.. حد من العالم دي »أحزاب إخوان سلفيين« جن أزرق.. خد رأيك في الخناقة.. سألك.. مع انهم بيتكلموا كلهم باسمك ... انت موافق علي القوانين وشايفها »كويسة« ولا لأ.. أبدا.. لانك بره الخريطة والحسبه.. يابا.. دول مش عايزين ورثة جدد يشاركوهم في التركه.. امال.. هما.. حيموتوا ليه علي ان تكون الانتخابات بنظام القوائم الحزبية »بس« .. لانه حيضمن لهم »كرسي« المجلس بما يمثله من »عيشة مستريحة«.. علي طبق من فضة.. ومش حيكون مطلوب منهم يدوك حاجة قدام »صوتك« ... لا خدمات ولا يحزنون.. وفي المقابل حيضحكوا عليك.. ويقولوا لك.. احنا بنقدم لك بدالها برنامج.. ينعش مستقبلك وفيه كل حلول أزماتك، وقرفك من عيشتك.. وهنا اوعي تاخدك »العزة« وتتفلسف وتقول آه.. انا ح انتخب برنامج مش »أشخاص«..
لاني ح اقولك.. انت »ياله« أهبل.. طب ما احنا جبنا في الحكومة الحالية أثنين وزرا من الأحزاب.. بين قوسين اللي كانت »هيء.. هيء.. هيء« معارضة للنظام السابق.. من اللي »صدعونا« بأن عندهم برامج عبقرية وفورية لحل مشاكلنا.. حد »فيهم« »حل« حاجة من يوم ما بقي »وزير« .. ابدا.. واهم ماشيين بنفس »خطي« الحزب الوطني وكل اللي اتغير ان »مصيلحي« بقي »جودة« و»جرانة« بقي »أبوالنور«..
وعلشان تتأكد ان العالم دي »أحزاب إخوان سلفيين« كلهم طمعانين في »الورث« لا غير .. انا اهوه وأنت اهوه.. هما مش عاملين »تحالف« بينهم علشان يدخلوا بيه الانتخابات.. كلها كام يوم .. وحيتفركش.. لان كل واحد منهم طمعان »المغارة« واللي فيها تبقي ليه لواحده! .. وعلي بابا بعد الضنا لابس حرير في حرير .
افهم.. الحدوتة كلها تغيير »يفط« حنشيل الوطني، ونحط بدالها »اسماء الورثة« »سلفي اخواني احزاب.. ائتلاف«
بعد اضراب الاتوبيسات .. المفروض يكتبوا علي حكومة شرف.. اللي يحب النبي يزق.