دي لحمة حماري يا معلم !

أما قبل

كل سنة وانتم طيبين .. إحنا في العيد والدنيا أجازة .. ولازم نريح دماغنا وأعصابنا شوية من هموم ومشاكل الحياة اليومية وانتقاد الأخطاء ..والدعاء علي بعض المسئولين المقصرين في حق الشعب !
أجازة العيد فترة للتسامح والود والتراحم والأضحية وتفريق اللحمة علي الغلابة .
وعلي سيرة اللحمة .. فعيد الأضحي علي ما أعتقد هوالفرصة الوحيدة لنأكل فيها لحم الغنم والبقر .. وللإفلات من تناول لحم الحمير، ولحم الكلاب، التي ملأت بطون المصريين وعقولهم كمان !!
آه والله زي ما بقولكم كده ...
حاكم أي واحد فينا لوجرب يمشي في الشارع ويراقب تصرفات الغالبية العظمي من المشاه وقائدي السيارات هياخد باله أكيد من كم التصرفات المزعجة والمليئة بالرعونة والحماقة التي يرتكبها البعض، والتي تدل علي أن هناك الكثير من بني البشر بيننا ينتمون لفصيلة آكلي لحوم الحمير !!
وإن كنت قد عدلت عن هذه الفكرة ولمت نفسي كثيرا في الحقيقة نظرا لأني اكتشفت أن الحمار نفسه بيتمتع بذكاء حاد وسلوكياته في الطريق ملتزمة ومتحفظة أكثر مننا نحن البشر .. وفي النهاية لحم الحمار لحمة برضه .!!
هي يعني الجاموسة كانت بتفهم اوي ؟ فاللي هاياكلها هايبقي ذكي مثلا !!
يبقي السر في إيه ؟.. إضطريت أسأل أحد أطباء الأغذية المشهورين ففاجأني بأن نقص الذكاء في المجتمع قد يصبح حقيقة مؤلمة وليس نكتة ولا تريقه !! وده نتيجة نقص معدلات أكل البروتين الحيواني عند الإنسان والذي سينتج عنه إنخفاض الأحماض الأمينية بالمخ وهي المادة اللازمة لذكاء الإنسان .. وقتها فهمت السبب أن ناس كتير ياعيني.. لا بتاكل لحمة، ولا بتدوق فراخ ولا تقدر علي سعر السمك .
وفهمت إيه السبب في أن معظم طلبة المدارس متعثرين في دراستهم .. وليه كتير من الموظفين الغلابة راسهم ناشفة ومش بيحبوا يمشوا مصالح الناس !
وليه العامل البسيط الغلبان بيفتقد المهارة والفن .. وليه انخفض معدل الإبتكار والابداع في المجتمع كله .. أتاري السر في عدم أكل اللحمة !
مافيش بروتين حيواني ..والأكل كله نشويات وخضروات فتركيزهم وذكاءهم قل، يعني ناس كتير يا عيني لا لحمة ولا فراخ ولا سمك .. ولا حتي لحم حمير .. لأنها بتتباع بسعر اللحم العادي .. وممكن برضه اقتراح تاني ، إننا نطالب أن تباع لحوم الحمير علانية وعلي عينك يا تاجر، كلحم حمير بسعر رمزي بدل ما بينضحك علينا ونشتريها غاليه !!
لكن .... كل اللي أقدر اقوله حاليا، إن العيد ده مناسبة للي يقدر يعطي من خيرات الله .. يزود في اللحمة شوية للغلابة، لأنها الفرصة الوحيدة المؤكدة اللي المحرومين يقدروا ياكلوا فيها لحمة بجد من غير غش ..لا حمير ولا كلاب .. وكل عام وأنتم ومصر بلدنا بخير .