الثورة.. ظالمة أم مظلومة؟

سامحيني يا ثورة أنت ظالمة ولا مظلومة. آه يا قلبي يا اللي انكوي من قبل الثورة وبعدها ببكي علي اللي فات واللي جاي واللي احنا فيه وبعدها. ثورة قولنا حرية ديمقراطية عدالة خلاص راح الظلم وظهر النور وطلعت شمس جديدة نظيفة ما أحلاها.. بعد ما راح من ولادنا كتير بنات وبنين قولنا ارتحنا واخترنا لمصر رئيس شرقاوي أصيل.. صحيح اخواني ناس كتير زعلت قوي ازاي ينجح اخواني ده الاخوان لو مسكوا البلد يخربوها طب ما هي البلد خربانة خربانة ايه الجديد ارباب سجون يمسكوا البلد ياجماعة ده ربنا سبحانه وتعالي بيقول »وتلك الأيام نداولها بين الناس«. صحيح المثل بيقول عليكم برأس الحية وليس بذيلها وفعلا الرءوس كلها الكبيرة الحرامية في السجون لكن الذيول شغالة بلطجة وقتل وسرقة وحرق ومعركة الجمل وغيرها مش عايزة البلد تنهض مش بس كده لا ده بقي فيه اخوان وسلفية وليبرالية وعلمانية وصغير وكبير يطلع يكلم وكله بيفتي في أي حاجة وفي كل حاجة حتي النساء والمعلمين والدكاترة والموظفين واقفين معترضين معطلين المصالح ولهم حقوق مش بس كده اللي معاك النهاردة بكرة ضدك. ياست الحاجة وياعم الحج لم ابنك اللي معلق شنطة مدرسته علي كتفه عمال يقذف طوب ونهايته يا قاتل يا مقتول وإلا هي بقت موضة ونفسك تكوني أم الشهيد وأبو الشهيد! كفاية بقي وتعالوا نضع ايدينا في ايد بعضينا ونحقق حلمنا مش المهم من الرئيس، مش مهم من حزب ايه، المهم مصر تنهض وتكبر أمامنا ساعتها ها نحب بعضنا ونشكر ربنا ومحدش يدخل أرضنا.
عصام سلطان
الأميرية القاهرة