قامت عركة كبيرة بين شباب الجيهة وشباب الضاهرية والسبب ان الاتحاد واللي كنا بنسميه زمان سيد البلد راح مصر وغلب الاهلي وجاب الكاس وقبل كل شيء يا حضرات.. الارزاق علي الله.. واللي يحبنا ييجي عندنا. واللي ما يحبناش.. يمشي وما يستناش.. ولان عشقي ومعشوقتي اسكندرية.. واتربيت في شوارعها وعارف كل حواريها.. وضربت وانضربت.. وهربت م المدرسة وفي التروماي ياما اتشعبطت.. ومعرفتش من المدرسة والعلم.. الا ان اكتب اسمي.. وبعدها خلص الكلام .. والكورة الشراب خدت من جتتي وصوابع رجليه رقات.. رقات.. حتي اسألوا الكالوا اللي محشور بين الصوابع لحد ما طق ومات.. وفتحت عنيا علياجدعها رجالة بشنبات.. وشوفت من صنف الحريم جمالات.. ما أنا اصلي كنت فتوة بعضلات وده زمان أيام ما كنا رجالة ووقفنا وقفة رجالة.. علي رأي عمنا الكبير المليجي في فيلم الارض. وأسمي ولمؤاخذة في ديالكلمة.. حميدو فتوح الصاحي.. اتولدت في بحري.. ولما كبرت وعرفت وشوفت الدنيا.. قولت في عقل بالي دراعك سلاحك.. وكلمتك حكمتك.. واوعي تسلم رقبتك لوليه.. أو واحدة ما تعرفش العيبة وسابقة الدلال وتحب الملاغية. القصد في يوم كان لونه اسود من قرن الخروب قامت عركة كبيرة بين شباب الجيهة وشباب الضاهرية والسبب ان الاتحاد واللي كنا بنسميه زمان سيد البلد راح مصر وغلب الاهلي وجاب الكاس ودي كانت عوايده دايماً زمان مش اليومين دول.. وعنها واحنا بحتفل وقاعدين لا بينا ولا علينا جه عيل وجايب معاه شوية شباب بيجي بيجي من اللي بيروح وييجي. . ورافع فالنة الاهلي.. وبيقول الاهلي عمهم وحابس دمهم.. ضربتها في دماغي.. طب ازاي.. تقول عيب يا أخونا.. مفيش فايدة.. يا جماعة كل حي يروح لحالة.. ابداً.. قولت ت ما بدهاش يا حميدو.. لازم ناخد حقنا.. ونرد علي الاهانة بروحنا ودمنا..وسحبت كرسي من القهوة.. ودبت العركة ومحسوبك متقولش عنه لعدوينك ضرب من فوق ومن تحت انا وولاد الجيهة لغاية ما قال هو واللي معاه حقي برقبتي... وجريوا زي الخرفان.. ولقيت المعلم عربي بيقولي عفارم عليك يا وله يا حميدو.. كسرتهم وحبست دمهم ومن النهاردة ح نسميك حميدو الفارس..ومن نهاريها وأنا اتصييت وصبح اسمي عليكل لسان واليوم اللي يلعب فيه الاتحاد وخصوصي في الكاس بيبقي يوم عيد عندي ما هو وش السعد عليا.. وكان فيه شوية لاعيبة اسم النبي حارسهم وصاينهم شحتة الاسكندراني وبوبو والجارم.. والجارم ده كان واد لاعيب ابن جنية.. كان اشول زي حلاتي والكورة كانت بتلزق في رجله زي الحلاوة يا جدع.. وكان بيخلي الاهلوية يجيبوا زيت من الجري وراه. ولما عمنا الكبير وتاج راسنا الحاج ايمن بدره صاحب فلوكة اخبار الرياضة بنت بياضة كلمني وقاللي ان الاتحاد يحتفل بميت سنة خدمة قلت ما بدهاش ابعت رسالة عن طريق الفلوكة بتاعته وأقول فيها اللي أنا عايزه.. ورزقي علي الله.. هو فين الاتحاد وامجاده.. دا كان اللاعيب من دول كان آخره بعد الفوز فالنة وشراب وكوتش من باتا وكان الله بالسر عليم.. ورغما عن كده كانوا رجالة في الملعب وياما شيبوا الاهلي. وإذا كان المسئولين عن نادي الاتحاد عملوا حفلة كبيرة وزيطة.. وفيه واحد جامد حبتين اسمه مصيلحي صارف كتير علشان الحفلة دي.. طيب يا عم صندوق «تحيا مصر» اولي.. انما تقول ايه رزق اخويا علي أبويا وأنت مالك بمصالحي يا أخويا.. ودول بس كلمتين كانوا واقفين في حلق الزور ولازم اقولهم.. ومشكرين .. مشكرين لكل حبايبنا الحلوين بحفلتهم متهنين.
