لكل باب "أُكرة"

تتنطط الكورة
بين السقف والأرضية
أتنطط خطوة تنظيم
خطبة الشيخ
منبر الأرابيسك
تكرار زخارف
عمله صنايعي مش حريف
الشاشة الإزاز
تتلون بخدعة اليوم.
وش المذيع مدهون كريم الأساس.
أقول أمشي
وما أمشيش.
أقف متنح بين الإزاز والشيش.
اللي ورا ضهري
أسهل من اللي قدامي!
والفرق جارح
بين اللى شايف بالجملة
واللى بيحفر ع الخشب
الغلطة في العمر عاهة
وكل عاهة تلزمنا بخطاياها.
أقول لأمي تدعيلي.
دعوتها تزق الحياة لقدام.
الميكروباص بيقسم الخط
ويدبلر الأجرة
لكل باب أكرة
وإلا نغير الكوالين.