مصر يا مه ..مصر يا به

هفت علىّ مسرحية باللو وأخونا فى الله أشرف عبد الباقى، وغيره عندما شبه الوطن بسيرك كبير، وجاء شاعر النضال الساخر وقال مصر يامَّه، مصر يابَّه إلخ إلخ.. ووجدت نفسى أنافسه فى شعره الوطنى الساخر وأقول مصر يا مَّه تعالى ادينى الرضعة فى البزازة يمكن اللبن الصناعى المستورد يفتح لى مخى الزنخ وأفهم إنتى عايزه إيه بالضبط؟
مصر يا مَّه.. مصر يا بَّه.. مصر يا نينة يا تيتة يا أم العجائب وإحنا ولادك عجب العجائب وسؤالى: نعم؟
عاوزه إيه يا مَّه يا مامى يا دادى؟
عاوزه أمن وأمان؟
خذى أمان واديله ادى أمانxأمان!
عاوزه زيت وسكر ولقمة هنية متغمسة فى التقلية وحسنة قليلة تمنع بلاوى كتيرة ؟!
خذى زيت وسكر وأكل وشرب وحاهريكى زيت لغاية ما تتلين مفاصلك وتشبعى بالهنا والشفا!!
مصر يا مَّه.. يا مامون يا بابى يا نينة؟
عاوزه جهاد وزرع وقلع وحصاد ودم الشهداء ومزيد منه، قوللى انطقى اخلص دى فرصتك قد لا تتكرر إلا بعد سنين وسنين وشعرى شاب فى إرضائك وإنتى لا ترضى إلا بالصبر وصبرك ملل وسط شعوب تحسم وتقطع العرق وتسيح دم!
عاوزة علاقات وصداقات وحب عدوك يمكن يحبك ويرضى عنك؟
عندك اتفاقية الانبطاح اللى خلصت وماتت وأماتت زرعك وجففت أنهارك وقطعت أوصالك مع قارتك السوداء، جدديها وبيع أرضك بيع وطنك شوفى الشارى مين وعندنا اللى ما يشترى يتفرج من جيرانك أصحاب البترودولار وحب الغرب وأسيادنا الأمريكان ورضاء الكارتر وعقوق الإنسان الذين لا يمارسون عقوقهم على الصهاينة والاستيطان. شغال فى القدس والضفة وغزة ومزة وتصريحات تقول وتعيد عن عودة المشروع الصهيونى وحدود النهرين، الله ينور!
مصر يا مَّه يا بَّه عاوزه إيه انطقى قولى اخلصى قبل ما تخلصى علينا بصبرك وصمتك وحيرتك.. عاوزه لباس العسكرى ولا عاوزه الملس والطرحة.. عاوزه تشتغلى وتجاهدى ولا عاوزه تفضلى عايشة على الشحاته وولادك فى حضنك وحسنة وأنا سيدك!
قوللى إللى إنتى عاوزاه لكن كلمة أقولها لك لو سمحتى لى اختيارك من دولهمه أو دوكهمه لازم ولادك حيشتغلوا مافيش بلطجة ولا سحت ولا شحاته فيه ثمن حتدفعيه يا مَّه يا بَّه يا دادى يا نينة يا حيلة!!