أقول يمْكِن

ء و تِقفِل عيني شبَّاكْها
يغطيني الضلام ...
فأنام
قوام أجري
على الأحلام

أقول الليلة راح تيجي
و أزرع ورد فى لساني
عشان يطرح
بأحلى كلام
و أسْتنَّى ...
على ناصية أمل طارح
يسابقني طريق رايح
على قدّام
طريق مفروش
بكام يمكن
و كام لسه
تكون بالوقت مش حاسّة ؟
ما يمكن تيجي دلوقتي ...
و كام مركب قلق يجري
على وقتي
أقول اصبُر
عشان تقْسِم
رغيف الطّلّة ويّاها
تلاقي حاجة شاغلاها
أكيد لسه كعادتها
تروح تسأل عن الأحباب
و يمكن حَد راح زارها
أكيد دارها
كما هوّ ...
بباب مفتوح
أكيد نفس الكرَم فيها
منين ما تروح
و لو تحتاجها ... تلقاها
أكيد فيه حاجة شاغلاها
أكيد راح تيجي دلوقتي ...
عشان عندي كلام ليها
و من تاني ... أوصِّيها
متنسيشي دوا السُّكَّر
وإوعي الدم يتعكّر
عشان ضغطِك
يكون مظبوط
و أرمح
من سوهاج ... أسيوط
عشان علبة علاج ليكي
أشدّ عليكي
بالكلمة
عشان برشامة
أو لقمة
و دمي ... مِ الزعل بيفور
و أغضب لو في يوم تنسِي
كلام دكتور
يوصّيكي
على النومة ...
على الحركة
و انتي برضه هيّ انتي
بتاخدي الدنيا بالبركة
ز يا واد اسكت ما تتعبنيش
هاعيش انْ ربنا كاتب
بإني أعيش
مافيش حاجة
بتمنع موت
و كلمة ف كلمة جُوّايا
خلاص .. الحلم كان بيفوت
و أصرخ .. صرختي ترجع
صَدَى مكبوت
و شوكة يأس بتمزّع
ف ِ توب الصوت
فأبعتلِك ...
جواب من قلبي مستعجل
و أتعلق بحبل الصبر
أقول يمكن جواباتي
فِ يوم توصل
لأهل القبر.