من غير حجاب.. سيد حجاب

غزل الكلام في مصنعه عشق الغنا ما ابدعه والقلب كان يعشق غناه وبيتبعه وبقول له من قلبي العليل يا سلسبيل الشعر رايح فين يا سيد قل لنا ده انت اللي فاضل من حلاوة الروح وعشق الدندنة ده انت اللي كنت بغنوتك بتلمنا وانت اللي كنت ف هدمتك
بتضمنا
وكان غناك
اجمل ربابه ف حينا
والكل كان مغرم صبابه
من كلامك اللي كان بيهزنا
ياصاحبي رايح فين
يا سيد قل لنا
الكل بالشوق والمحبه
باعت إليك ياعمنا
صحبه من الحب الجميل
وكتاب من الشعر النبيل
اللي ساكن جوه روحنا وقلبنا
وما دمت يا سيد مصمم ع الرحيل
ارجوك تسلم ع الرفاق الطيبين
اللي فارقونا يا سيد من سنين
بيرم وشوقي
وبرضه وياهم جاهين
وخد لهم وياك ياسيد
حفنة تراب من أرضنا
وقل لهم
من بعدكم سكتت مواويل الغرام
وانشل في الحلق الغنا
HHH
انا ياسيد
مش حغيب عنك كتير
وبقول لقاك
ياحبيبنا ابدا مش بعيد
ممكن يكون دلوقتي حالا
او حتي لو عدت سنه
وساعتها حاخدك جوه حضني
واقول ياصاحبي وحشتنا
واطمنك
علي كل احبابك هنا
وندق بوابة الحياه
واقول خلاص
مابقاش يا صاحبي في بلدنا
اي حاجه محزنه
ولا اي جرح يهزنا
وحلمك اتحقق ياسيد
ورجعنا تاني للاماني والغنا
نتلاقي من بعد الفراق
نتلاقي ياسيد ونحضن بعضنا
ونوسع التوب اللي ضاق
وحفره واحده النهايه تضمنا