فوازير البرنامج العام 2 حبوها بالأفعال

«حبوها بالأفعال»
حصريا لصباح الخير حتى آخر رمضان ننشرحلقات فوازير «حبوها بالأفعال» التى تذاع يوميا على شبكة البرنامج العام فى تمام الساعة الخامسة إلا خمس دقائق مساء طوال شهر رمضان, التى يقدمها الفنان شريف منير ويكتبها الشاعر جمال بخيت وإخراج أيمن فتيحة
وتدور فكرة فوازير «حبوها بالأفعال» حول الشخصيات التى تركت أثرا وبصمة على المجتمع المصرى بإنجازها..حتى لو لم تكن شخصيات مصرية.
والمطلوب هو اسم الشخصية التى تدور حولها الفزورة.. فى كل عدد سنقدم عشر فوازير
وإليكم نص الفوازير ..
11
رمز المحبة.. وعيون أبوه
ولا عرفوا زيه.. ولا فيش أخوه
آية خلقها رب العباد
جمال بيسحر إللى شافوه
...
نبى وعايش ف بيت نبوة
وأبوه يشيله ف القلب جوه
إخواته ضلوا.. نسيوا الإخوة
وغاروا منه.. ف البير رموه
...
معجزته كانت ف جمال صفاته
ومصر كانت مشوار حياته
يحلم عشانها الحلم ذاته
ولقى ف مصر اللى صدقوه
...
مصر إللى خيرها دايما وفير
جالها المهاجر عبدالبصير
وقال ح ييجى جفاف خطير
والقمح ينقص مش ح تلاقوه
...
سبعة ف سبعة.. عدت سنين
ومصر تنجو يامؤمنين
مصر العزيزة ف كل دين
وخيرها دايما للى صانوه
12
الخير ف كفه.. خُضرة ونعمة
والكلمة منه.. بألف كلمة
مر ف حياتنا كأنه نسمة
لكنه أسس دولة وحضارة
...
ف الحكمة رأيه هو اللى سايد
ف الشعر عنده نبع القصايد
صامد بقوة وقت الشدايد
قائد وصانع اسمه بجدارة
...
إماراتنا كانت أشتات.. جمعها
الأمة فرحت يوم اجتماعها
وحدة.. وعاشت.. والكون سمعها
سبعة وصاروا.. أجمل منارة
...
مؤمن بقيمة مصر ومكانها
حافظ عطاءها.. وحاسس حنانها
وكل شارع بناه عشانها
بالحب مبنى.. مش بالحجارة
...
الخير ف روحه.. مصر ف ضميره
مع مصيرها ربط مصيره
وولاده مشيوا على خط سيره
نفوس غنية بالاستنارة
13
يا أهل مصر الحرية.. أنت وهيه
يا فلاحين.. يا أفندية.. من أيها جيل
قوموا بينا نجمع أمتنا.. على كلمتنا
وعشان ننول حريتنا.. نعمل توكيل
زعيمنا باسمنا يتكلم.. أو يتظلم
ضد احتلال مخه مضلم.. أهوج ورزيل
أحلام بلادى محاوطانى.. يا تاج بريطانى
والثورة قايمة ف أوطانى.. ودا حق أصيل
الثورة شعبية وزاحفة.. وماهيش خايفة
لو حتى رميتوه ف المنفى.. يبقى لنا دليل
واهو جمّع الوفد بهمة.. ف بيت الأمة
وولادنا باسمه ح تتسمى.. ويروق النيل
14
الفن صادق قوى.. عمره ما كان كداب
لما رماه الهوى وقال: القمر ع الباب
لكل منا قمر . ممكن يغنى له
ويقول له: أنت الملك.. أو يعمله بواب
...
أما قمر ربنا.. عالى وما بينزلش
ومستحيل نوصله.. لو كنا ما بنعقلش
ومستحيل نلمسه.. لو كنا ما بنعملش
بالفكر والتجربة.. والعلم بالأسباب
...
وعالمنا مصرى قوى.. ومسيرته ونّاسه
الكلمة منه دهب.. وفكرته.. ماسة
حافظ صخور القمر.. حتى أسألوا ناسا
شاورت على خبرته.. وقالت له دا المطلوب
...
مطلوب نعدى الزمن.. بالعلم مش بالهبش
بالهبش نرجع ورا.. بالعلم ما نغلبش
كل اللى وصل القمر.. هو اللى عقله ما غابش
هو اللى فكره انتصر.. ع الوعد والمكتوب
15
وردِك جميل.. وف كل أوان
يطرح حياة.. وهَنا وألوان
ويهز قلبى «دعاء كروان»
حتى ان سمعته «بين الأطلال»
...
«يا نهر حب».. ونهر سلام
يا غنوة من «أرض الأحلام»
«لحن الخلود» معزوف لمقام
فنك..
وفنك نور وخيال
...
فنك عظيم من فيلم لفيلم
لأنه كان معجون بالحلم
جواب ومكتوب لنا (للعلم)
خدوا بالكوا.. واتغيروا ف الحال
...
إيه «الحرام» غير فقر . وداس
على فقير «ظلموه الناس»
«أيامنا حلوة».. لو الإحساس
يصبح أساس صُنع الأجيال
...
الحب ليه أصبح معتل
وليه زمان الود اختل
«أريد حلا».. جايب حل
بالفن نبنى نساء ورجال
16
على القلوب طبطبى
اسقى الحنان واشربى
أنا ف المقام حضرتك
بادعى واقول مطلبى
الستر من ربنا
والحب يشفع لنا
يا منورة حينا
يا بنت بنت النبى
...
يا زهرة الأوليا
يا بنت سيدنا على
النور ملا مسجدك
قنديل.. شَفا المُبتلى
صليت.. لمحت الضيا
والقلب أصبح ولى
أهيم ف حب الله
وحب الحياة.. مذهبى
يا بنت.. بنت النبى
...
يا أم العواجز.. أنا
محسوب من المحاسيب
اخترتى ليه مصرنا
إلا لحب عجيب؟!
عشتى الأمان والرضا
والود والترحيب
تيجى النفوس متعبة
تداويها.. وترحبى
يا بنت.. بنت النبى
17
ف يوم .. ف شهر .. ف سنة
بين الآلام والهنا
كتب أمير الطرب
أحلى الكلام ف الغنا
...
شاعر جميل ومضىء
فلاح من الزقازيق
قالها بقلب جرىء
أنا سوف أحيا .. أنا
...
عاشق وقلبه داب
دوّب معاه أحباب
جاب القمر ع الباب
وعلّمه الدندنة
...
الضحك .. شوق للناس
واللعب .. نور ونّاس
والجَد .. إيد تنباس
والحب عنده .. غِنى
...
من غير ما تسأل ليه
الشعر عاش حواليه
أما براوة عليه
مهما بعد أو دنا
18
إياك ييجى له صرع
كل اللى قام واتمرع
وقال عليه منقرع
بانى الهرم الأصغر
...
ربى العظيم يحرسه
والنور يطوف مجلسه
كل اللى ح يدّرسه
ف مناهج الأزهر
...
ح تخسر إيه يا فصيح
لو قولت اسمه صحيح
جدك ف وش الريح
بنى تاريخ مبهر
...
خوفو وخفرع قمم
وهو اسمه علم
بنى لنا تالت هرم
كمّل لنا المنظر
...
جدك يا ابنى احفظه
واحفظ جلال مركزه
كمل بُناه .. وعززه
تعلا معاه وتكبر
19
البطريرك الفصيح
بركة يسوع المسيح
واقف مع المجاريح
حسن ف إيد مينا
...
مهما نعيش معاناه
وطن الخلود .. معناه
مهما نعيش جواه
هو يعيش فينا
...
القبط .. مصريين
مهما يكون الدين
ع القدس مش رايحين
غير ويّا بعضينا
...
راهب وله أشعار
فيها العبر أنهار
محبة .. واستغفار
بالخير .. توصينا
...
شمع الكنايس داب
من فرقة الأحباب
والبابا مهما غاب
روحه تواسينا
20
عيون حورس
تشوف صورة العدو شاملة
وودن الصقر
بتسمع دبة النملة
بعيد عن مصر
ويوهبها حياة كاملة
بعيد عن مصر
دا قدره .. يارب وقدرها
...
بعيد عن مصر ؟!
مش معقول
دا كان قلبه هنا علىطول
يعيش ف الضلمة .. سر مهول
ومن روحه ينورها
...
طراز نادر .. مالوش شفرة
وعايش وسط ناس كافرة
لمصر .. بيحفروا .. حفرة
دىحرب .. ومين ح يخسرها
...
هنا أهله .. وهنا ناسه
هناك يحبس فىأنفاسه
يعيش مع مصر إحساسه
لحد ما عمله .. ينصرها