قصر التيه

قلنا نمشي مع الكون ونلف ف دايرة بس نسينا نمسك إيد بعض درنا عكس عقارب الساعة ماسكين في رقاب بعض بعد شوية شوية مشيوا كده زجزاج وشوية كده زجزاج والكل قلع حافي وعري دماغه للشمس وهاج من لسع الاسفلت ينط يمط رقبته يجعر في القرص الوهاج‏:‏ آه لو نعرف فين المخرج من قصر التيه من مصر التيه الوحش اللي بياكل لحم ضناه
الوحش المعبود في المركز
ومتاهة حواديت حاضناه
واحنا بنقرب منه
واللا بنبعد
واللا بنشرد وبنتغرب ونتوه في الدهاليز؟
(2)
يا عم من أين الطريق
ومنين يروحوا لفين؟
السيدة تايهة في سيدنا الحسين
هو المكان هواه بحق وحقيق؟
فايت في قلب القاهرة ومعدي
شايف دسوق وشبين وشامم أبها
عيوني سامعة والشراب ع الجبهة
في وسط ملايين بس ضايع وحدي
الدائري علي كل حزن يودي
في مدينة تتباهي بعجز عزابها
الورد طالع ليه بدم مندي
وليه طومان باي اتصلب علي بابها؟
مين اللي دس الحيرة في أعتابها؟
دا سحر و اللا دا عمل بالأيدي
واللا قدم منحوس
بيدوس في قلب شبابها؟
(3)
- سيب القتيل في ضهرك
وامشي وضهرك إليه
ترجع إليه تاني
توصل لأصل الجريمة
تلقي القتيل بلا شك هو الجاني
والمذبحة بلا شك خدمة عظيمة
- وبناء عليه؟
- قالها الحكيم كراكون
أصلا مفيش في الكون خطوط مستقيمة
(4)
القطة عامية والنبي في البير
يوسف عيون بكره بشمسه بصير
مين يرفعه م البير يجيب الشمس؟
مين دا اللي دلي الحبل؟.. مين قصه؟
لحد إمتي بكره هو الأمس
والشيء ماهوش نفسه
المهد هو القبر
لحد إمتي يطول بمصر الصبر
مع إن حبله قصير؟!
(5)
باشق بطن سمكة
لقيتني ف بطن حوت
وسمكتي ف إيدي بتلعب
وعيونها بنت بنوت
خاتم سليمان بيلمع
جوه الخشم الياقوت
دعكته شفت نفسي
ملفوف مع أخطبوط
أنا والخادم في شبكة
متلعبكين في خيوط
في عتمة جوه حلكة
والليل فوقنا تابوت
وباهز المارد: غيتني
طلعني للشطوط
خادم سليمان الجني
قال انجدني.. باموت.
(6)
الغول في قصر التيه
أكل البقر كله
والقلب أكله الدمع من ذله
من غله وسط التوهة والمعاتيه
وسمعت ضحكة ف قلبي بتقول له:
فاكر ح تخرج من هنا يا نبيه؟
..........
أنا أعترف لك يا عظيم الهامة
يا فارع القامة
إني ضئيل محتار
وبالف زي الفار
في متاهة كلها همس وعتامة
وكأنه وش محار في قلب محار
أنا أعترف.. إني فقدت البوصلة
والسمع والإبصار
لكن حبيبتي كانت سابت لي خصلة
كانت رمتني برمش.. رمش مرعرع
لفيته علي نفسي.. علي العواميد
مديته ع الأفاريز
علقته زينة عيد
عناقيد من الأنوار
وزحفت.. عقلة إصبع
في عتمة الدهاليز
وعشان حبيبتي هواها جوه مشعشع
ورمشها جبار
بالقلب ح اقدر م المتاهة اتحرر
بالقلب طالع
شعب م الأحرار.