العريس

كل دي حنة وما جاش فرحك يا مصر؟ كل دول شهدا وما نتهناش بنصر؟ نكتم الزغاريد في زورنا لحد إمتي؟ قال لي صوتي خلاص, ما عادشي فيها صبر
م الصواني اخترت شربات ورد بلدي
ريحته جنة مفحفحة من أعلي قبر
أنتخب م الورد انا الصابح مندي
اللي قال لعروسته روحي ليكي مهر
م العيون, أختار عيون ما فهاش ملاوعة
بتقول: احنا خدامين, وبكل فخر
م القلوب: القلب لابيض. نجمة طالعة
في العيون سهرانة بتقول جي فجر
م الشفايف: اللي بسمتها بريئة
يعني حرف الشفة مش مايل بمكر
م الإيدين, مش ح انتخب لا مسقفاتي
ولا إيد اتلوثت في أي عصر
ولا إيد نهبت دهبنا السخن لاحمر
اللي ذنبه ما يغسلوش ولا ألف بحر
باختصار.. اناح انتخب إنسان عاجبني
فيه حماسة الشباب من سن إبني
شعره أبيض, شعره إسود, شعره بني
شعره مش مصبوغ. ودا الشيء المهم
قلبه مش مصبوغ. ودا الأمر الأهم
كل دي أحلام, وتكتيكات, ودم؟
كل دي تعابين وجوز حمامات في كم؟
كل دا توهان في عطفة يا حارة هم؟
كل دا تخريم ودان؟!
يا عريس اظهر وبان
لبس الحلوة بحنان
الحلق وغويشة التعبان
قوام دي الحالة غم
مش مهم تكون جميل
المهم تكون أصيل ونبيل وشهم
قلبك العاشق دليل
والحب صادق
والمبادئ
هيا هياها المبادئ
اللي راح علشانها ميت عاشق وعاشق
مرمي ع الأسفلت في هالة دما
اتكنس في الركن وشه للسما
شاف عروسته الحلوة والوش ابتسم