على طريقة الخال الغُربة

عارف يا وَلَدِى الغربة كيفها عاملة زى عروسه وحشة وإنت قابلها بعيبها عاملة زى الشمس قاسية فى عز صيفها
........................
لما كنت زمان باسافر
كنت غاوى يا ولدى اعافر
كنت كافر
بس مش كُفر بإله
كُفرى كان كُفر انتباه
إن قطر العمر ماشي
وانى عكس الاتجاه
............................
تعرف يا ولدي
لو يعود العمر بيا
هرفع على نفسى قضية
إزاى رضيت القطر يمشي
وإنت تبعد عن عينيا
...........................
الغربة قاسية وناسها ناسية
إن وراها خلق عايشة
والزوجة لما يغيب راجلها
بتبقى دايخة
بتبقى فى عيون الديابة
رحيتها فايحة
شايفة الطمعانين فى حالها
اللى غاوى يشوف جمالها
واللى بيدادى ف عيالها
بتبقى دايخة
خايفه يسقط منها شالها
عاملة فيها 10 رجال
وهى شايخة
ولّا وَلَدَكْ لما العيال يضربوه
بيقى عايز يجرى يشكيهم لابوه
ولّا لما ناس كبيرة يشتموه
إيه ذنب طفل بيتولد من غير أبوه
ملعون أبوه
..............................
مفيش حاجة اسمها الدولة الشقيقة
يا ولدى مهما تكون غريب
والغربة ضِيقَةْ
أيام كتير نمت فيها على الرصيف
كل الفصول كانت تعدى أشوفها صيف
وساعات خريف
وساعات شتا ودا شئ مخيف
..................................
الغربة مهما تشوفها زينة
هى تُرْبَةْ
ومهما نورها يزيد يا ولدى
تبقى ضلمة
ناس كتير متغربين
نفسها ترجع يا ولدى
بس خايفة الديانين
وناس كتيرة يا ولدى تاهوا
ونسيوا هما جُم منين
.................................
الغربه سيف يا ولدي
على رقبة فقير
نفسه بحد السيف الرقبة تطير
أمانة يا وَلَدِى لو تسافر
خليك حريص
إياك يا ولدى تسيب وراك
ناس كتير