أشعارنا فى رثاء الأبنودى

عدى النهار

عدى النهار واللا يا خال احنا رأينا الحلم من بعد الغيامة
فارد جناحه ع الشجر ؟
مستنيين يرجع لنا بكرة الجديد
عدى النهار
واللا احنا يا خال ابتدينا بعد توهة
نوصل بمركب حبنا الشط البعيد ؟
عدى النهار
واللا احنا يا خال بالإرادة
قدرنا نهزم سطوة الغول العنيد ؟
عدى النهار
عدى النهار ازاى يا خال ؟
والشمس طالعه منورة كل الوجود
عدى النهار ازاى يا خال؟
صوت البلابل ع الشجر
بيردد اللحن السعيد
كان بدرى والله ع الرحيل
لأننا شفنا غيابك عننا شىء مستحيل
كان بدرى والله ع الرحيل
لأننا شلنا غناك فى صدرنا
ولأننا وياك ياخال ..
راح نهزم الليل الطويل
كان بدرى والله ع الرحيل
وعمرنا أبدا ما صدقنا ان فرسك ح يفاجئنا بالسفر ..
ويسيبنا ياصاحبى حيارى بدون دليل
كان بدرى والله ع الرحيل
بعد ما اتهجيت وجعنا
بأحلى شعر واغلى معنى
فى زمان دبلت على شجرُه المعانى
فى كمان ماتت على وترُه الأغانى
والغنا اللى فى يوم حبيبنا طيّرُه
صار مجرد ولولة وأصبح عويل
مين ياخال من بعد سفرك راح يغنى غنوتك ويكون لنا حادى ودليل ؟
قوللى مين بعدك حيمسك دفة الشعر الأصيل ؟
ده انت كنت برغم جرحك
كنت تعلن ياما فرحك
فوق سمانا كنت تكتب غنوتك
كنت تعلن ثورتك
كنت بتعلِّى غناك
وكأنك رغم قسوة علتك ..
كنت بترد الجميل
ليه يا أبنودى كده ؟
عمرنا يا صاحبى أبداً ما اتفقنا على كده !
إنما نرجع نقول
إن ده حكم الإله
اللى قدّر رزقنا مع عمرنا ف لوح الحياة
ولابد للحكم الإلهى نمتثل
ولابد نستسلم إذا حل الأجل
ونمد إيدنا قبل منك بالوداع
وإيدينا بالصبر الجميل نطوى الشراع
أرجوك ياصاحبى قبل ما ترحل بعيد عن مصرنا
خد معاك حبة تراب من أرضنا
خد معاك حبة دفا من شمسنا
طمن جميع الراحلين عن حينا
بان مصر بقت عمار
وعاد لنا تانى النهار
والمغربية بعد عتمة وليل طويل
رجعت تصالح شمسنا