حدوتة شعبية.. الديك الأخضر

"طلع الديك لخضر لخضر, يربش ع الكوم, مبسوط بنفسه وبيغنى: أنا الدويك لخضر لخضر.. أربش ع الكوم واتمخطر, وهوَّ ماشي لقى قمحتين, كان شبعان هوّ, بص كده لقى واحده طالعة, راح نادى عليها وقال لها : رايحه فين يا خاله؟
قالت له : رايحه نطحن.
قال لها : طب خدى القمحتين دول, يزودوا لك الطحين.
قالت له : ليه ؟ .. ما تاكلهم .
قال لها : لأ .. أنا شبعان.
إدعت له, وراحت واخداهم منه - كويِّس - خلاّها وهىّ راجعة , قالها: يا القمحتين يا سُطْل الدقيق..
ونط نطه كده ح يقلب اللى فوقيها.
قالت له : خُد - ماهو ح يقلب الدقيق - وادته سُطل الدقيق.
خدهم كده وخلاص..
هوّ راح ياكل دقيق! عدى كده لقى واحدة بتخبز قال لها : سلامو عليكو.
قالت له: إزيَّك يا ديك.. رايح على فين؟
قال لها: بتعملى إيه؟
قالت له: باخبز الخبيز.
قال لها: خدى زودى عجينك بدول.
قالت له: ليه؟ ما تخليهم لك.
قال لها: هوّ أنا حاكل دقيق.
قالت له: طيب .. وراحت وخداهم.
بعد ما راحت وخداهم, وهى لسّه حاتطلع البتاو راح ناطط لها على الطبق وقال لها: دول بتوعى.
قالت له : إيه ده يا ديك ؟!
قال لها : بتوعى بتوعي.. وكان ح يقلب لها العجين كله باللى فيه.
قالت له : خدهم وامشى.
راح واخدهم وماشي.. وهو ماشي لقى واحد عما يبيع بصل اخضر , قال له : إيه .. يا عم الحج.. بتبيع إيه ؟
قال له : بنبيع بصل أخضر.
قال له : طب خُد اتغدى عيش حامى.. أَهُه. راح مديهم له..
وبعد ما اداهم له, راح ماسك أكبر طن وقال له : دا بتاعى. لسه ح يقول له أو .... قال له : دا بتاعى. يا تجيب البتاو بتاعى يا ....
راح قايم وقعد يتعارك معاه..
لمَّا زهق منه قال له : خدهم , وغور.
راح واخدهم ومشى.
وهوَّ ماشي لقى جماعة غنامة قاعدين يتغدوا, قال لهم : خدوا اتغدوا بدول..
خدوهم وقعدوا يتغدوا بيهم.
بعد ما اتغدوا جه ماسك جِدى وقال لهم: دا بتاعى.
قالوا: يا ديك إيه اللى ع تعمله ده ؟ ! ..
قال لهم : بالطول بالعرض الجدى يا طن البصل..
الجدى دا بتاعى.
قالوا له : خده وغور.
وبرضك وهوَّ ماشي لقى جماعة قاعدين في فرح, بيتكلموا في حاجات الفرح, لمَّا وقف عندهم سألوه : إيه فيه إيه ؟
قال لهم : بكره عندكم فرح.. خدوا الجدى دا ادبحوه. لسه حا يسألوه: يا ديك هه ......راح مقاطعهم بالكلام و قال لهم : بس خدوه.. خير ربنا كتير. خدوه ودبحوه..
وبعد ما دبحوه , وعملوا الفرح, جه وسط الناس في الفرح وراح ماسك فى الخروف, وقال : دا بتاعى..
يا تجيبوا لى الجدى بتاعى يا الخروف.
وفضلوا وراه يا ديك يا ديك..إنه يكون فيه فايده.. مافيش. .. قالوا له : خُده.. راح واخد الخروف وماشى.
وهو ماشي لقى جماعة محتاجين , قال لهم : فيه إيه ؟
قالوا له : والله إحنا في ضيق.. ما عارفينش نبيع إيه ولاّ نعملوا إيه ؟ مافيش غير العجل ده قدامنا.
قال لهم : خدوا الخروف ده بيعوه.
سألوه: أنت جايبه منين؟
قال لهم : بس خدوه.. أنا عندى كتير.
خَدوا الخروف وراحوا باعوه , وفكوا أزمتهم.
وهُمّا راجعين جه ماسك فى العجل البقرى, وقال لهم : دا بتاعى. يا تيجيبوا لى الخروف بتاعى ياخد العجل.
وقعد يكاكي ويضرب فيهم وينط على ده وعلى ده ... لما مالقيوش فايدة, قالوا له : خده وامشى.
وفي الطريق - واخد بالك - لقى ناس , راح داخل عليهم , واداهم العجل .
قالوا له: إيه اللى ع تعمله ده؟
قال لهم : بس خدوه وما تتكلموش.
هما خدوه , وبعد خدوه ما واتصرفوا فيه دبحوه ولا باعوه, راح ماسك فى الجاموسة, وقال: دى بتاعتى .. يا تجيبوا لى العجله بتاعتى , يا خد الجاموسة.
ولما ما لقيوش حل ولا بل معاه, راح واخد الجاموسة وماشى.
وهو ماشي شاف عروسة حلوة, ميَّل على جماعتها وقال لهم : تاخدوا الجاموسة بالعروسة.. وراح متجوّز بيها ..
وعاشوا في تبات ونبات..*
وخلفوا صبيان وبنات "
....................
جمعها أحمد توفيق من الراوي: عصمت نفادي المكان : البداري / أسيوط