الجنينة

ريح بعد ريح بعد ريح يهتز نخلك سدي فيكي الزمان مراجيح والبخت والأفئدة في الحب.. متشعلقين..
راحوا الفوارس فدا
فدا صباكي المليح
يا عدرا.. يا سيدة
خوخ بعد توت بعد تين
يهتز غصنك حزين
يا جنينة من غير حسن
كان مين رماكي كده؟
الخولي م الفلاحين
زي الشجر والندي
دا حلم واللا بصحيح؟
واللا دا ريح بعد ريح؟
الورد طالع سنين
أحمر مفيش غير كده
طه وحسن واسماعين
ومريمة وسيدة
حلم الحواري الجريح
ضنا الحواري الطريح
جوع بعد ريح بعد ريح
النخلة جايبة الغدا
يا طلاعين النخيل
يا شباب يا جيل بعد جيل
يا للي رويتوا الوطن
بالروح وورد الردي
ياللي خريفكم ربيع
وذكري موتكم جنينة
وانتم خوليها حسن
بيكم نكيد العدا
غاص القدم في الرمال
وصبرنا صبر الجمال
توهة اربعين عام, وجوع
القوت كلام ابن ريح
والملح ملح الدموع
والعيش هباب الصفيح
آن الأوان..الجموع
نفرش لهم مائدة.