العريس الندل!

يا همك التقيل يا بهية.. الراجل راح واتكل علي الله.. وساب كوم العيال في رقبتي, والقرشين الاحتياطي المتحوشين.. اتصرفوا وما عدش في البيت خزين, لا قمح ولا زيت ولا ازازة دوا ولا جاز, ولا حتي عندي جوزين بط...,
يا دي الحزن اللي جه راسي وحط..
الرب في التدبير بس العيال مصاريفها كتير, واللي زاد وغطي كمان.. لا عيل بيذاكر ويعمل اللي عليه, لا عيل بيشتغل ويقول خدي يا امة.. ولا حد عاد بيسمع لي كلمة!
هكذا تحدثت بهية الي نفسها
و من طلعة الشمس خرجت الي الترعة, جلست تحت الجميزة الكبيرة, التي تتدلي في الماء فروعها..
مر علي الزراعية مطوبس ابن سنية, فنزل وشد خلفه حماره, وذهب الي حيث كانت تجلس ليبدأ معها حواره..
ساموو عليكووو...
نظرت نحوه بهية ثم اشاحت بوجهها نحو الترعة
اكمل حديثه: يعني يا بهية لو تهاودي وتطاوعيني مش كنا يا بنت الناس اتجوزنا وبقيتي حلالي و لميتك انتي وعيالك في داري
بقولك ايه يا مطوبس انا مش فايقة لك, ولا تجيب سيرة عيالي ولا عيالك
يا بت دانا من زمن الزمن بحلم وافكر ومهما قلت لك في القلب اكتر.. يا بت دانا( حليم و نزهي) ومش هاخليكي محتاجة اي كافة شئ, وبدال رغيفين قمح الدرة ها اكلك( مانجة), وبدال لمبة الجاز هاشتريلك كلوب بطارية ماركة( دونت ميكس)!
يا ابن سنية سيبني في حالي.. ربنا سا ترها معانا و البركة في عيالي
يا بهية اعقلي واركزي,( لقد نفذ رصيدكم في البنك المركزي), و ابنك اللي بيشتغل مع السواح فلس, واللي كان بيبيع ويشتري قفل دكانته وجاب ضلفها, واللي كان مسافر السعودية اتفنش ورجع يا ولداه, و البنات عتبتهم جزاز, ما نايبهم غير التحرش و مش لا قيين جواز, حتي ابنك اللي في بورسعيد مش طايق نفسه و بيتخانق مع دبان وشه..
بغضب شديد ردت عليه: قطع لسان اللي يجيب سيرة حد من عيالي بكلمة, انا عيالي احسن شباب في البلد ورافعين راسي, و اللي ما ياخدهمش تاج علي راسه, ما استعناش اخده مداسي
هز رأسه وشد حماره ومضي.. لكنه طول الطريق كان يفكر في بهية وعنادها, كيف يخضعها و يتزوجها و يضع يده علي قيراطين ارض العيال ويبيع مصاغها ؟ قال له عقله, هانت وما عدش في الخيمة غير عامودين, هي مستقوية بابنها ابو بدلة ميري بشريطين ؟ ولا بنتها اللي متجوزة في السويس بتبعت لها قرشين ؟ بكرة تشوفي يا بهية اللي مطوبس هايعمله في الارض والعيال والدار, وان ما كنت اجيبك علي ركبك يبقي انا(...............) تعثرت قدمه فجأة فانزلق في الترعة وغرق و حزن عليه الحمار!!!
Gihan13080@yahoo.com