مرتضى منصور يعلق على أزمة «الوايت نايتس»

علق مرتضى منصور رئيس نادي الزمالك على أزمة حضور الجماهير لمباراة صن داونز الجنوب إفريقي والتي ستقام الأحد في دور الثمانية بدوري أبطال إفريقيا قائلًا، "أنا في لجنة الأندية كان عندي اقتراح قولته أن طول مافي ألتراس موجود طول مامفيش حاجة اسمها جماهير، بلطجة وقلة أدب وإجرام وسفالة".
تابع: "سيادة الرئيس عمل مداخلة مع عمرو أديب وقال عليهم دول ولادنا وبردو طلع مع أسامة كمال وقال نفس الكلام، وأنا كان ليا رأي وعتاب شديد للسيد الرئيس وهو عتاب محبة إن السيد الرئيس يعني ليه في الجيش والمعدات، راجل ظابط مخابرات هو مش بتاع كورة يعني، عكس المشير طنطاوي كان زملكاوي ويحضر الماتشات وكل واحد وليه اهتماماته".
واصل، "أنا كان ليا رأي وأعلنته علنًا ولادنا عمرهم مكانو بلطجية عمرهم مايشتمو الجيش ويقولو يسقط حكم العسكر وادنا عمرهم مايتبولو على الشرطة والعساكر الغلابة ولادنا عمهم مايروحو يشرعوا في قتل العامري فاروق وزير الرياضة، ولادنا عمرهم مايروحو يسرقوا اتحاد الكرة ويسرقوه ويولعو فيه، ولادنا عمرهم مايقتحموا مطار القاهرة ويضربوا قنابل ويدمورا السياحة لأ دول مش ولادنا، ولادنا مايقطعوش مترو الأنفاق، دول مجرمين صيع بلطجية، مش أنا اللي قولت المحكمة هي اللي قالت ياسيادة الرئيس ألتراس جماعة إرهابية محظورة".
أردف، "أنا كان ليا رأي أن الماتشات يحضر أعضاء الجمعية العمومية، أنا عندي 5 آلاف واحد أبرك من 20 ألف يشتمو الجيش والشرطة ويعملولي مشاكل ويموتو بعض، ومتاخدش بكلامي في ماتش الأهلي الأخير في برج العرب وأتغلب فيه من أسيك وكان حاجة صعبة أن الأهلي يتغلب أدام جمهوره، الجمهور المحترم كان بيشجع والعيال الصيع عملو أيه، الشرطة والجيش يومها وزعوا 6 آلاف وجبه عليهم علشان يفطروا في رمضان وجابولهم حاجات ساقعة، ومع ذلك شتيمة في الجيش شتيمة في الشرطة شتيمة في محمود طاهر في عماد وحيد أمين الصندوق في كل البلد، واتحولوا في مهاجمة اللاعبين ونتيجته إن الأهلي اتغلب".