من أسبوع فات دخلت معركة حامية الوطيس مع مئات «الإخوة والأخوات» على تويتر حول سلسلة تويتات كتبتها تعليقا على أحداث الإستاد، اللى الشرطة ضربت فيها جماهير ألتراس الأهلى، انتقاما منهم عشان شتموا مبارك والعادلى والشاعر وقد تكون الشتيمة جَت فى الداخلية كلّها. بدأ الحوار بكلام ردّده الكثيرون يلقون فيه باللّوم على شباب الألتراس «لأ ماهو ماينفعش يشتموا، كده بيستفزّوهم فلمّا يدوّروا فيهم الضرب يبقى عادى!» زى بالظبط ما بيتقال على رد فعل الشرطة العسكرية من الاعتداء على المتظاهرين لو جابوا بالسوء سيرة الجيش أو حد من قادته! أحب أسجّل هنا بس ان ولا الشعب ولا المتظاهرين ولا الجيش ولا قادته أطفال؛ ففكرة انك تشتمنى فانا أضربك دى فكرة مش مناسبة خالص هنا! المتظاهرين لمّا يشتموا أى قيادة فى البلد سواء من الجيش أو برّاه ده مش موضوع شخصي؛ ولا يعرفوه شخصيّا ولا بيشتموه عشان موقف شخصى، بيشتموا وظيفته اللى إدّيتله سلطة إنّه يعمل ما أغضبهم مثلا، مش هو. فأخذ ده على إنّه إهانة شخصية لذلك المسؤول حركة أقل ما توصف بيه إنّها «عيالي» الحقيقة. ثانيا حتى لو المتظاهرين شتموا الداخلية زى فى حالة الإستاد، ده مش معناه إن الظبّاط المفروض ياخدوا الموضوع على كرامتهم ويسلّطوا العساكر عشان يكسّروا عضم ولاد ال.... اللى بيستجروا ويشتموهم دول! الجماهير دى بتشتم نظام شُرَطى كان بيضايقهم وبيعاديهم وبيرسم عنهم صورة قبيحة عند الرأى العام مع إنّهم مجرّد شباب مصرى بيحب الكورة وبيحب ناديه وبيشجّعه بحماس؛ بيحب فكرة ذلك التجمّع، الرابطة، الأخوية اللى بتجمعهم. ليه نضايقهم؟ عشان بيعبّروا عن نفسهم بطريقة لا تُعجِب المُحافظين منّا؟ ليه عايز الناس يتصرّفوا زيّك؟ دلوقتى نروح لأخلاقيّة المسألة بعيدا عن السياسة؛ هل من حق جماهير الكورة إنّها تشتم وهى فى الإستاد؟ بما إن ده بيتعارض مع الآداب العامة كما يقول الكثيرون. علما إن طول عمر الإستاد فيه شتيمة، هو خلقته كده؛ إنفعال، شغف، رغبة فى المكسب، خوف من الخسارة، غضب من تقصير، إعتراض على قرار للحكم، هيّ خلقتها كده! الشتيمة نظريا ضد الآداب العامة؟ آه. لكن هل معنى كده إن مش من حق حد يستعملها فى العلن؟ الشتيمة جزء من ثقافة أى شعب فى الدنيا، فيه ناس بيستعملوها فى التعبير عن مشاعرهم الغاضبة أو حتّى فى وصف إعجابهم، اللى قد يستلزم استعمال كلمات قوية التأثير توصفه. والمصريين مبدئيا لا يُنكر أمين إن عندهم فى ثقافتهم معجم مُبهر جدا من الشتايم؛ جزء من ثقافتهم! فيه خط فاصل بين إستعمالَى الشتيمة الأساسيين؛ أولا الشتيمة بتاعة التعبير دى، وثانيا الشتيمة المُوجّهة لشخص بقصد الإهانة. ودى مؤذية للمشاعر فعلا ومتّفقين على قُبحها. بس لو فيه شباب مثلا واقفين فى الشارع بيتكلّموا وبيستعملوا ألفاظ مش بتاعة البيت يعني؛ «النهارده يومى كان إبن كذا، الشارع مليان زبالة كده ليه هم ولاد ال.... دول عايزين يعيّشونا فى الزبالة ولّا إيه» وهكذا. ناس كتير بيشوفوا إن مش من حق الولاد دول إنّهم يستعملوا تلك الألفاظ فى الشارع لإنها بتإذى مشاعر نساءهم وأطفالهم اللى ممكن بالصدفة يكونوا معدّيين جنب الشباب. بصراحة بقه ده كلام عجيب جدا! هى الست المحترمة لمّا تسمع شتيمة أبيحة فى الشارع حتطلع تستعملها مع ولادها وجوزها واصحابها؟ هى عبيطة لا مؤاخذة؟ ويعنى إيه الشتيمة بتإذى مشاعرى فمش عايز اسمعها؟ طب إفرض أنا صوتى وحش وواقف أتكلّم مع حد فى الشارع، حد ييجى يقولّى إنت صوتك بيإذى ودانى ماتتكلّمش؟ أو يقولّى قميصك مؤذى لعينى ماتلبسوش!؟ الشارع ملك للجميع، يمارس فيه الجميع حياتهم كما يحلو لهم، شريطة ألّا تعتدى على الناس؛ وكونك إنت بتعتبر إن الشتيمة اللى سمعِتها مراتك ده إعتداء عليها، إثبت الإعتداء، ورّينا الضرر، هات تقرير طبّى من المستشفى بالضرر الجسدى أو النفسى اللى وقع عليها! أنا كمان بَمشى مع مراتى فى الشارع على فكرة وفكّرت كذا مرّة فى الموضوع لمّا حصل قدّامنا، لإنّ الفكرة فى موروثى الثقافى أنا كمان، واعترفت لنفسى إن مش من حقّى أروح لحد أقولّه يتكلّم على مزاجى ومزاج مراتي! بنتى كمان كبرت وبقالها سنين بتفهم كل حاجة بتتقال، وساعات بيبقى فيه شتيمة فى الشارع واحنا معدّيين، ولو سمعِت واحدة فيهم وسألتنى عنها، بفهّمها إن دى شتيمة وعيب، وانّها مش مفروض أبدا تستعملها، وبتفهم! وعمرها ما شتمت حد، مع إنّى عمرى ما سدّيت ودانها، ومع إنّى أصلا أنا نفسى لسانى بيفلت ساعات قدّامها وانا سايق ولّا منفعل بتكلّم فى حاجة! وهو ده مغزى التربية على فكرة، إنّك تعلّم ولادك يتصرّفوا ازاى، مش تعلّمهم يخلّوا الناس يتصرّفوا على مزاجهم؛ إنّك تبنى فى ولادك نسق أخلاقى يحكم تصرّفاتهم همّ، مش يبقى عايز يخرس اللى مش عاجبه ويخفى اللى مش على مزاجه فى بقية الناس. ولو حد عايز يلاقى حد كبير معدّى أو ست أو عيال صغيّرين يوطّى صوته أو مايشتمش، على سبيل الذوق يتفضّل، لكن ده مش فرض، مش من حقّه يفرضه. ناس كتير ييجوا يتكلّموا فى الموضوع ده يكرّروا حديث الرسول «ليس المؤمن بطعّان ولا لعّان ولا فاحش ولا بذىء» دى نصيحة على فكرة، نصيحة لبنى آدمين مش لملايكة! المؤمن مش مفروض يبقى كذا وكذا بس ده مش معناه ان اللى يشتم مايبقاش مؤمن ولا حاجة! ماحدّش قال إن الشتيمة فضيلة بس ماهيّاش خطيئة كذلك، ومش كلّها قلّة أدب! الأشياء ليست دائما كما تبدو.. المصدر : جريده التحرير
