مخرج مسلسل "كلبش 2" يخرج عن صمته ويرد على منتقديه

خرج المخرج بيتر ميمي، مخرج مسلسل كلبش 2، عن صمته بسبب الانتقادات الموجهة للمسلسل بسبب وجود الكثير من الأخطاء الإخراجية.
ونشر بيتر تدوينه له على صفحته الشخصية على موقع التواصل الاجتماعي "فيس بوك" أكد فيها: "أنا عادة مش برد على تعليقات لكن بقراها وباخدها باهتمام للتطور وفعلا الحمدلله وبفضله التطور موجود من عمل لآخر ومن سنة لآخرى.
اقرأ أيضاً.. على طريقة رامز جلال.. هنيدي ينفذ "مقلب" في "أرض النفاق" (فيديو)
وتابع ميمي: "لكن حبيت أرد على بعض التعليقات لأن فعلا نسبة مشاهدة كلبش أصبحت فوق المتوقع لدرجة أكبر بكتير كمان من رمضان السابق".
وجاء رد بيتر في السطور القادمة عن الأخطاء التي شاهدها البعض فعلق قائلاً: "عاكف أبو العز بيتحدث بلهجة صعيدية وأبوه بلهجة بدوية وده باين من أول حلقة متبقاش صعيدى زى اللى خلفتك وهنعرف مين اللى خلفته وليه مش أبوه اللى رباه حلقة 15 ومعانا مصحح لهجة بدوى ومصحح لهجة صعيدى للدقة".
واستكمل: "ضابط الأمن الوطنى ممكن يكون بدقن وشعر طويل عادى جدا وأنا راجعت ده بنفسي قبل التصوير من بعض الضباط وقيادات الداخلية وإحنا بناخد التصاريح للتصوير في أماكن حقيقية وحية مثل سجن طرة ومستشفى الشرطة".
واستطرد في الحديث قائلاً: "وضعية مسك الآلى ممكن تكون من الماسورة وأثناء الأشتباك ممكن تكون من الخزنة لسرعة تغيير الخزنة وكان معانا عميد من العمليات الخاصة أثناء تصوير المشاهد ديه والراجل كان بيدى المحاضرة ديه قدامى للضباط مع العلم إن المدرعات والمركبات والجنود والضباط هم حقيقيين من العمليات الخاصة".
وأضاف ميمي: "تراك جيم أو ثرونس اللى في أول حلقة ده غلطة غير مقصودة لأن إحنا في المونتاج بنحط تراكات عالمية وبعدين بنشيلها في الميكساج ده بيحصل في كل الشغل والحلقة الأولى كان فيها 13 تراك من جيم أوف ثرونس تم تغييرهم بموسيقى المسلسل ونسيو واحد سهوا وبعتذر على الخطأ غير المقصود برده لأنى طلبت تغييرات فى الحلقة اكتر من مرة كل شوية بعدل فيها وإحنا عاملين موسيقى للمسلسل مصر كلها عارفاها من السنة اللى فاتت".
وعلق بيتر عن حالة ابن سليم قائلاً: "ابن سليم الأنصارى بيرضع كراوية مع أنه المفروض بيرضع ريد بول عادي".
واستكمل: "الحلقة 8 أنا عيدت المشهد لما روچينا قالت عمر بدل حسام سهوا والمونتير من ضيق الوقت حط الشوت الغلط سهوا".
وعبر عن حبه لتيم العمل موضحاً: "أنا بشكر الناس اللى متابعة المسلسل بدقة شديدة وبشكر فريق العمل (النجوم - الإنتاج - المونتاج - التأليف - الميكساج - الموسيقى- الديكور - مساعدين الإخراج) علشان إحنا بسببكم بنافس على أعلى مشاهدة للسنة التانية على التوالى بجزء تانى وده مبيحصلش".
واختتم كلامه قائلاً: "كلبش2 بما فيه من أكشن وضخامة إنتاجية هيكون ولا حاجة بالنسبة للمشروع اللى تم تحديده للعام المقبل رمضان 2019 واللى هيكون الأضخم عربيا وبيضم مجموعة من نجوم عالميين من إنتاج شركة سينيرجى إن شاء لله.. إدعولنا بقى إحنا بنحاول نطور الصناعة وانتظرو حرب كرموز في مصر والخليج وأوروبا- إيطاليا - ألمانيا- لندن".