أحمد آدم لمهاجميه: «ماكنتش متخيل إن ضحكنا بيضايقكم أوي كده»

علق الفنان أحمد آدم، فى آخر حلقات برنامجه “بنى آدم شو”، والمذاعة على قناة “الحياة” على حملات تشويهه، بسبب تصريحاته عن الأزمة السورية، وقال: "لسه ديل الكلب شغال معايا وبتهدد دلوقتى، مكنتش عارف إنى تاعبهم وحارقهم أوى كده، مكنتش متخيل أن الضحك اللى بنضحكه ده بيضايقهم أوى كده، والله هما مش عاوزين حد يضحك، ولا عاوزينا نفرح".
وأضاف “آدم”، خلال برنامجه “بنى آدم شو”: "لم أتصور أن برنامجى يهز كيان قنوات فضائية كبيرة، ينفق عليها مليارات، لا أصدق أن برنامجى هز محطات بهذا الشكل.. كنا بنهزر خدوها جد ليه وقولتونى كلام مقولتهوش، الدنيا قامت عليا بسبب خبر فبركوه ليا، وعشت وشوفت نظرية ديل الكلب بتطبق عليا".
وأكد "آدم"، أنه لم يقصد إهانة الشهداء فى حلب أو السخرية منهم، مشيرا إلى أنه هاجم قناة الجزيرة وتركيا فقط: “مش ممكن أتريق على شهداء.. وأنا مش كوميديان غبى، ولو عملت كدة الجمهور عمره ما هيضحك على اللى بقدمه”.
وأردف: “مينفعش تتريق على أى فضيلة، لأن التريقة علشان تجيب ضحك لازم تبقى على الرذائل.. مينفعش تتريق على الكريم لكن ممكن تتريق على البخيل، ومينفعش تتريق على واحد صادق أو شجاع أو أمين.. الشهداء ربنا كرمهم من فوق 7 سماوات وقال أحياء عند ربهم يرزقون”.
ووجه “آدم” الشكر لفضائية “الجزيرة”: “أنا بشكرك علشان عرفت أثبت للناس إنك بتفبركى الأخبار وبتضحكى علينا”.