الشاعر محمود رضوان (1) "شابلن" دا آخر حد فى الدنيا تتوقع دموع عينه آخر حد لو غاب شهور الناس تسأل تقول فينه؟ بيدوروا ديماً عليه لما الهموم تكتر أو يحبوا يضحكوا من القلب "شابلن" دا كلب! بيكون كلامهم كدة لما الغباوة تستحوذ على قلوبهم "شابلن" معندوش بيت ولا حب ولا جيرة "شابلن" أسير الليل والوحدة والحيرة.
(2) مشى الشوارع يا حزين طيب زمان جرحك إيه اللى ممكن يعمله دلوقت؟ بيضيق عليك الوقت والحزن فنان عمال يغير كل يوم ملامح وشك "البيبي" يضحك يقول للهموم: وهو مفيش غيرى إوعى كدة سيبي. تملى راسم ضحكته فى الوش تحت الطاقية ولفة العكاز "شابلن" دا واد أُستاذ ينعاز ساعات: تعالى يا "شابلن" إشرب شاى تعالى يا "شابلن" إتعشى يهز راسه قال يعنى مشغول وشارد سرحان بيتمشى "شابلن" عزيز النفس يا أندال غير بس ذُل السؤال والوحدة والوجع اللى جوا القلب "شابلن" عمره ما هيهز ديله فى عيونكم ويعمل كلب والكلب أطهر من قلوبكم لو لسة جواكم أساسا قلب.
(3) وكان دايماً فى عز الليل والبرد والزحمة يكلم حد ويسألوه الناس: يا "شابلن" بتبتسم على إيه ومين بتكلم؟ يكمل فى الطريق عادى ويضحك فى الوشوش ويمشى السكة يتألم هو إنتوا لازم تعرفوا يعنى بكلم مين؟ من إمتى كان بيهمكوا أمرى؟ من إمتى وإنتو طيبين؟.
(4) "ليزا" حبيبة الروح صديقة الجرح والوحدة اللى بتزوره ساعات عشان بس تمسح دمعته فى الليل وكتير يحس بإن هى البيت هى الونس والدفا فى البرد "ليزا" المراية اللى شايفة كل اللى بيخبيه كل اللى عمره ما انكشف على حد و"شابلن" البكر عمره خياله ما بيشطح معاها بعيد مش محتاج من الدنيا أكتر من لمسة واحدة من إيديها البيض ونفسه لما يموت، يموت وهو ماسك إيديها وهى عارفة كدة ومصدقاه "شابلن" مش قليل البخت زى ما ناس كتير شايفاه لكنه عنده مبدأ فى الحياة وبيستخبى ورا فقره وقلة الحيلة مع جزمته الحيلة وبدلته الغامقة الكحيلة.
(5) لكن بخيلة إنتى قوى يا دنية المتاعيس ما بتضحكيش غير بس للأندال وعشان كدة "شابلن" مالوش فيكى ولا عمره مرة فى يوم هيبص على كعبك هو الوحيد اللى قادر فى حتته يلاعبك هو الوحيد اللى تعبك علشان مالوش عوذة هتدخليله منين وهو مش عايز ولا محتاج لشيء منك؟ غير بس "ليزا" الجميلة وهى أجمل ضحكة فى ننك.
(6) يا دنية الغش ما تحاوليش شابلن معاه مامعهوش بيعيش بيقسم اللقمة فى الشارع ويا أى حد غريب بتشبعه ابتسامة ود من صاحب حبيب دايما طبيب للغلابة اللى قلوبهم مجروحين ومْرَمْيين ع الأرصفة فى البرد يا دوب يعدى عليهم بس ويطبطب ويمسح دموعهم السُخنة اللى فوق الخد يرقص يضحكهم ويزيد كمان فى الرقص، فيضحكوا أكتر تجيب الضحكة آخر حد فى الشارع يحس الكل بوجوده ويقولوا هو أكيد مفيش غيره بيعمل من الضحكة البريئة فى الليالى السودة طقس وابن اللذينة عمره ما شبع م الرقص. (8) ما أبرعك يا "شابلن" فى الرقص والتمثيل كهين أوى ولئيم لما تلبس دور وعبقرى لما بيسقط عليك من فوق شعاع النور وفى لحظة يختفى شابلن وفى أى ركن ينام وتعدى كدة أيام لا حد يسأل عليه ولا حد بيزوره ما بتوحشوش الناس ولا الزحمة ووحدته كفياه غير بس "ليزا" حبيبته البيضا بنت الحياة