أحمد آدم يسخر من تامر حبيب: حكمك عليّ من خلال البرومو "مصيبة"

علق الفنان أحمد آدم، في حلقة يوم الأربعاء، من برنامجه "بني آدم شو" والمذاعة على قناة "الحياة" على الهجوم عليه بسبب تصريحاته بشأن حلب، قائلًا "لسه ديل الكلب شغال معايا وبتهدد دلوقتي، مكنتش عارف إني تاعبهم وحارقهم أوي كده، مكنتش متخيل أن الضحك اللي بنضحكه ده بيضايقهم أوي كده، والله هما مش عاوزين حد يضحك، ولا عاوزينا نفرح".
وتابع "آدم"، خلال برنامجه "بني آدم شو"، لم اتصور أن برنامجي يهز كيان قنوات فضائية كبيرة، ينفق عليها مليارات، لا أصدق أن برنامجي هز محطات بهذا الشكل، مضيفا: "كنا بنهزر خدوها جد ليه وقولتوني كلام مقولتهوش، الدنيا قامت عليا بسبب خبر فبركوه ليا، وعشت وشوفت نظرية ديل الكلب بتطبق عليا".
وسخر الفنان أحمد آدم، من الارتفاع الشديد في درجات الحرارة الفترة الماضية، قائلًا: "مش معقول الحر، والأرصاد بتقول لسة انتظروا موجة حار قادمة". وأضاف كنت بحس أن الشمس طالعة هيا وأولادها، اللي بيحصل مش طبيعي، وبسمع درجات حرارة غريبة، يعني لو أنت جعان وسايق ممكن تقلي بيضتين على التابلوه".
وأكد الفنان أحمد آدم، أنه لم يقصد إهانة الشهداء في حلب أو السخرية منهم، مشيرا إلى أنه هاجم قناة الجزيرة وتركيا فقط.
وقال آدم: "مش ممكن أتريق على شهداء.. وأنا مش كوميديان غبي، ولو عملت كدة الجمهور عمره ماهيضحك على اللي بقدمه". وتابع: "مينفعش تتريق على أي فضيلة، لأن التريقة علشان تجيب ضحك لازم تبقى على الرذائل.. مينفعش تتريق على الكريم لكن ممكن تتريق على البخيل، ومينفعش تتريق على واحد صادق أو شجاع أو أمين". وواصل: "الشهداء ربنا كرمهم من فوق 7 سماوات وقال أحياء عند ربهم يرزقون".
وسخر الفنان أحمد آدم، من السيناريست تامر حبيب، قائلًا: "يخرب بيت سهر الليالي، يعني قبلها مكناش بنسهر الليالي، وحبيب كان عضو في لجنة تحكيم برنامج "الراقصة"، استاذ تحكيم يا بيضا درجة أولى، لقيته بيعلق على رقص متسابقة، ويقولها انتي بترقصي حلو بس ناقصك الهوبا". وأضاف "ده انت يا راجل سيناريست، دايما لما حد ينتقد فيلم أدامك تتفلسف وتقول متحكمش على أي فيلم من غير متشوفه، تروح تحكم على الحلقة بتاعتي من البرومو وأنت مؤلف ومبدع تبقى انت مصيبة، ولو اتفرجت على الحلقة ومتمسك إنني أهنت حلب يبقى مصيبتين".
وقال الفنان أحمد آدم: إحنا عارفين أن الدولة في حالة حرب، وكلنا معرضون للخطر.. وعندى استعداد أموت في سبيل البلد..علشان أنا بعشق ترابها.. واللى في قلبى على لسانى.
ووجه "آدم" الشكر لفضائية "الجزيرة"، القطرية، قائلا: "أنا بشكرك علشان عرفت أثبت للناس أنت بتفبركى الأخبار، وبتضحكى علينا".