ميسرة ل«بيومي فؤاد»: «ليه روحت مهرجان الرياض لما مش عايز تضحك الناس؟!»

علقت الفنانة ميسرة، على حالة الجدل المثارة مؤخرا بسبب الفنان بيومي فؤاد، عقب مهاجمته الفنان محمد سلام بعد إنتهاء عرض مسرحية «زواج اصطناعي» في إطار فعاليات موسم الرياض بالسعودية، وذلك بسبب اعتذاره عن المشاركة في المسرحية بسبب ما يعانيه شعب فلسطين.
الكيان المغتصب المجرم
وقالت ميسرة في تصريح ل«أهل مصر»: «محمد سلام إنسان وبشر وشايف اللي بيحصل للناس وزي ما أحنا كلنا متألمين وبنعيط وبنشوف المشاهد دي وندعي أننا نخش حرب علشان ربنا يساعدنا ونبيد هذا الكيان المغتصب، يارب والله دعوة من القلب بدعيها أننا كلنا كعرب كدا نتحد ونخش حرب ضد هذا الكيان المغتصب المجرم بكل المقاييس، أن هو يعتذر ده حقه الشرعي، وبعدين أن هو بيومي يقدر يروح ويعرض المسرحية في السعودية دي قدرته هو وصوابعك مش زي بعضيها، فيه انسان الموضوع بيأثر فيه جدا ويرفضه وفيه انسان يقدر يروح حتى لو كان مأثر فيه».
أنت عامل مسرحية كوميدية رايح تعمل ايه؟
وتابعت: «لكن اللي مضايقة منه كلمة بيومي فؤاد لأن ملهاش لأزمة خالص أنا كنت أتوقع منه أن هو يهدي الجو بين هيئة الترفيه ومحمد سلام ويوضح لهم وجهة نظره بدل ما يطلع على كتافه ويطلع يقول هذه الجملة اللي ملهاش اي معني لغاية دلوقتي مفهمتهاش أنت بتقول أحنا مش جايين نضحك أمال أنت رايح تعمل أيه أنت أساسا كوميديان، هو الضحك غلط ؟! مش غلط، الأساس أن الفنان الكوميدي بيعالج نفسيا، ساعات لو حد مكتئب بينصحوه يتفرج على حاجة تضحك فيلم أو مسرحية حلوة كوميدية تضحك، اذا أنت شايف أنك مش رايح تضحك أمال رايح تعمل ايه؟، أنت عامل مسرحية كوميدية استعراضية رايح تعمل ايه؟».
روح واسكت وحاول تهدي الجو
وأضافت ميسرة: «بتتعب ما أنت بتاخد اجر اللي أنت بتتعبه زي اي انسان بيشتغل وبياخد الأجر وبالعكس، أنت أجرك جامد جدا عن ناس كتير جدا بتتعب اضعافك ومبياخدوش تمن اللي أنت بتاخده أنت واخد شهرة ومجد وكل حاجة ايه لازمة الكلام ده أنا مش فاهمة بصراحة، بيومي فؤاد كان من النجوم اللي كنت بحب أحضر لهم بس بجد الكلمة دي ضايقتني منه جدا جدا جدا، وبعدين انت بتزود حساسيات ليه؟، المفروض أننا كشعب عربي حاليا أننا نتحد كلنا ونبقى حاجة واحدة وأحنا والسعودية حاجة واحدة، متجيش أنت تقوم الدنيا لأنك عارف أن فيه ناس كتير جدا مؤيدة موقف محمد سلام فأنت ليه بتعمل الحساسية دي علشان ايه؟، هي كدولة ارتبطت ارتباطات دولية في مسابقات دولية مقدرتش تعتذر عنها وكملت المهرجان وكان وقتها موضوع غزة أنت كفنان روحت تقدم مسرحية روح واسكت وحاول تهدي الجو مش تشعلل الجو اكتر».
اعتذرت يا محمد أعتذر وأنت ساكت
وأكملت ميسرة: «الحاجة الوحيدة اللي أخدها على محمد سلام أنه نزل فيديو بهذا الموضوع، أنت اعتذرت يا محمد أعتذر وأنت ساكت متنزلش فيديوهات لأن ده بيعمل حساسيات زي اللي عملوا بيومي فؤاد، لكن سلام موقفه محترم واللي عايز يعمله يعمله هو ليه حرية الرأي بس بدون ما كان يطلع بهذا الفيديو».