أبرز تصريحات أحمد فهمي في برنامج أسرار النجوم

حل الفنان والمطرب أحمد فهمى، ضيف فى برنامج 'أسرار النجوم'، الذى تقدمة الإعلامية إنجى على، و الذى يعرض كل خميس على نجوم 'إف إم', و'نجوم إف إم تى فى'.
و من أبرز هذه التصريحات
'سنة 2022 كانت فترة مراجعة النفس لكل الحاجات، ورفضت أشتغل فيها، وركزت مع عيلتي ووالدتي وأخواتي وصحتي، وبيزنس خارج الفن، وفي نص السنة اللي فاتت اتعرض عليا مشروع شغال عليه حاليا بإشراف مريم نعوم ونجلاء الحديني، وبدأنا تصويره فعليا في نص أكتوبر اللي فات، وهو مسلسل 30 حلقة وفيه تفاصيل كتيرة ومعانا صبا مبارك وعلي الطيب وناردين فرج، هو مسلسل فورمات وحلو ومختلف اسمه ' بين السطور' وفضلنا كثير نعدل في الورق'.
'كنت هعتذر عن الدور بسبب شوية حاجات اللي مكنتش راضي عنها وفي أول جلسة بيننا كنت متعصب ولكن هما تفهموا وجهة نظري وعدلنا في الدور، وصبا مبارك، فنانة موهوبة ومحترفة وبتفهم في الدراما والتفاصيل وعاملة مجهود رهيب في المسلسل، والمفروض ينزل في شهر رمضان أو بعده'.
ا
'أنا عصبي جدًا للأسف، ومش بقبل الغلط حتى وأنا غلطان، فحاولت في السنة اللي فاتت أقلل الحدة دي وبخرجها من خلال أني أروح للجيم أو في أي عمل تاني'.
'وبردو منطق الصداقة اتغير في زماننا الحالي، وكان مهم بردو أني أقرب من ولادي وعندي ابني ' عمر' السنة اللي جاية هيدخل الجامعة وعلاقتي به اتظبطت بشكل قوي من 3 سنوات وبقى بيننا صداقة أقوى، وابني التاني ' حسن ' عنده 12 سنة فقربت منه كتير عشان كدا قررت في 2022 مشتغلش كتير'.
المنصات أفادت الدراما
'المنصات أفادت جدا الدراما، وعملت فكرة الأعمال ال15 حلقة و7 حلقات وفيه أفكار مش بتحتاج تطويل، وعشان كدا بدأنا في رمضان حتى نقدم الفكرة دي بعيدا عن التطويل والمط في عمل 30 حلقة، وبردو فكرة الانتشار والمنصات مش مربوطة بس ببلد لوحدها".
'كان ليا تجارب كتيرة جدًا، ولكن أول حاجة حسيت أني فيها مختلف كممثل ومش أنا كان مسلسل ' الداعية ' من كتابة الدكتور مدحت العدل، ووجهة نظري إن التمثيل بيحتاج ممارسة ومعرفة مشاكل نفسي'.
'اللي بيخلي الجواز يدوم هو التفاهم، وباخد رأي مراتي ' أميرة ' في أعمالي بالتأكيد وهي صاحبة صوت رائع، والتواصل عموما هو اللي بينجح أي حاجة، وبيعجبني فيها حنيتها وثقافتها ودماغها، وبحاول زرع قيم كتيرة في أولادي من الترابط والدين وعدم الكذب وضرورة الصراحة وإتقان اللي بيعملوه في الحياة'.
"واما" نجاح كبير
'شوفنا أن فريق 'واما' بذرة كل نجاح وصلنا له دلوقتي، فبقينا على قد ما نقدر نشتغل على أن تكون الفرقة موجودة، ومع ذلك كل واحد فينا عارف 'واما' هتخلص في يوما ما، لأننا عمرنا ما هنفضل ' Boy band' وهاتيلي 'Boy band' في العالم فضل مكمل على نفس الطريق، وكل فترة بنحاول نعمل أغنية أو حاجة رغم أننا مقلين وعاملين 5 أو 6 ألبومات في تاريخنا'.
'لأن 80% من الحاجات إحنا اللي بنعملها بأنفسنا من كلام ولحن وتوزيع، وغصب عننا بنتأثر باللي بيحصل في السوق بعيدًا عن هويتنا اللي بتخصنا، فمثًلا المزيكا لو راحت في اتجاه معين فبنتأثر أكيد، وإحنا بقالنا 20 سنة بنغني، وبالتأكيد بقى فيه جيل تاني'.
التجديد مطلوب
'في النهاية التجديد مطلوب، والوقت دا اللي لازم ندي لناس بعدنا تطلع، ودا مش معناه أننا توقفنا ولكن عندنا كتير نقدمه، ودلوقتي في نوعية مزيكا جديدة وظهرلنا فنان زي ويجز وأنا بحبه شخصيًا.. ومن وقت الثورة لغاية دلوقتي بقى فيه نوعيات ولغة مختلفة ودايرة الجمهور وسعت، وكل نوعية مزيكا مختلفة لها الجمهور الخاص بها'.
و فى سياق آخر تألق المطرب أحمد فهمى، مع فريقه 'واما' فى أغنية 'مش حلوة بس'، الذى طرحت مؤخرًا و هى من كلمات و ألحان عزيز الشافعي، توزيع وميكساج وماستر توما.
و إليكم كلمات الأغنية:
'القوام أوام ياخدك في ثانية
والعيون جنون في حته تانية
مستحيل تشيل عينك من عليها
أنت جيت خلاص سلم نفسك ليها
القوام غزال بس بغزالة
طب إيه العمل في أمل ولا استحالة
مستحيل قتيل هموت عليها
أنت جيت خلاص سلم نفسك ليها
مش حلوه بس
دي حلوه اوي اوي
استنوا بس أشوف دخلتها منين
مش ناقص بس غير أقول الكلمتين
عامله إيه ازيك إيه الجمال ده
إنتي أحلي وأرق واحدة في المكان ده
الحكاية باختصار مش عارف ابتديها
كان في دماغي حاجات دلوقتي خلاص ناسيها
افتكرت سؤال بالإذن كلمه
إنتي ملكة جمال ولا انتي نجمه
الحكاية باختصار الڤولت عالي
ضرب نار مش هزار خدي رايحه فين تعالي
مش حلوه بس
دي حلوه اوي اوي
استنوا بس أشوف دخلتها منين
القلب حس بحاجات جميلة اوي
مش ناقص بس غير أقول الكلمتين
شوفت ناس وعرفت ناس لكن خلاص بيها اكتفيت
جاي منين وروحت فين أنت نسيت ولا اتنسيت
أنت جيت خلاص سلم نفسك ليها
مش حلوه بس
دي حلوه اوي اوي
استنوا بس أشوف دخلتها منين
القلب حس بحاجات جميلة اوي'.