محمد سامي عن تعرض زوجته للهجوم: "في ناس عاوزة تبقى مكانها" (فيديو)

تحدث المخرج محمد سامي، عن علاقته بزوجته الفنانة مي عمر، قائلا: "وهو أنا بعمل حاجة غير إني بكدب عليها كزوج مش كمخرج؟! وعلى طول بتقفشني لأنها أكتر واحدة حفظاني في العالم وبغير الكذبة 3 مرات وبعد كده بقول الصراحة .. من خاف سلم".
وأضاف سامي، في حواره مع الإعلامية بسمة وهبة مقدمة برنامج "العرافة"، الذي يعرض عبر شاشة "المحور": "وبالنسبة للتعامل معها في اللوكيشن، فقد تعاملت معها بشكل مختلف من كل فترة لأخرى، فقد كانت تظهر 10% من قدراتها أمام الكاميرا وكنت أنفعل جدا، لأنها كانت تؤدي في البروفات بشكل أفضل، وهذا كان يرجع إلى انعدام خبرتها".
وتابع: "حبي لها كان مخليني غيران عليها، وعاوزها تبقى أحسن حد، لأنها مراتي حبيبتي، وبالتالي كنت ببقى قاسي عليها جدا كنت بوترها جدا وبتعامل بطريقة غلط جدا وأزعق لها وأقول لها يا بنتي، وزمايلنا كانوا يقولوا لي بالراحة عليها هي لسه بتبدأ، وبعد شوية الانفعال بقى يجي من منطقة تانية، ولما بقت شاطرة وبقى عندها خبرة الموضوع اختلف، ولما بقت نجمة بقيت أفرمل نفسي".
اقرأ أيضا محمد سامي يعتذر لمغني أردني: أخرجت كليب وحش.. ومستعد أعمله حاجة جديدة على حسابي (فيديو)
وواصل: "مرة كنا في باريس قالت لي جملة ضايقتني أوي، مش بتاخد بالك إنك في التصوير بتبقى أكتر في الانفعال عليّ لأني أقرب حد ليك، والموضوع ده بيضايقني وبتحرج لأننا في وسط الناس"، لترد عليه الإعلامية بسمة وهبة قائلة: "أصل مش هتسيب لك الأوردر وتمشي".
اقرأ أيضا محمد سامي: غادة عبدالرازق أكتر حد ظلمني.. وأنا سريع الغضب بشكل مبالغ فيه (فيديو)
ورد عليها محمد سامي قائلا: "لأ طبعا متقدرش تمشي وتسيب اللوكيشن وده عشانها ومش عشاني، وعموما أنا رديت عليها وقلت لها أنا خايف عليكِ وعاوزك تبقي كويسة، لكن هي قالت لي انت خايف على الباقيين ومش بتتعامل معاهم زيي، ومن اليوم ده بقيت أتعامل معها بطريقة مختلفة، وخاصة دلوقتي بقيت أتعامل معاها باحتراف وزيها زي كل الممثلين .. هي إنسان محترف أوي وشاطر".
وحول تعرضها للهجوم، قال: "ده بسبب وجودي، الناس من الأول قالوا إن مي نجحت عشان جوزها، ومفيش حاجة اسمها كده، ومسلسل لؤلؤ كان بطولة مطلقة ليها ونجح في الوطن العربي كله، والناس اللي بتكتب على السوشيال ميديا حاجات كتير بتبقى حاجات لناس وناس حقيقية بس عاوزة تكون مكاننا".