ننشر في هذه الصفحات مجموعة من الأعمال لمبدعين تقدموا لمسابقة أخبار الأدب، وحصلوا علي درجات متميزة من قبل لجان التحكيم، إلا أنهم لم يفوزوا، ونحن نحتفي بهم لأنهم مواهب تستحق ذلك. مفيش حاجَة بِتوجَعني .. و لا بَبكي أبويا .. و ربِّنا عجِّل سفَر روحُه إلي الملكوت حَبيبتي .. مُطمَئِن عليها دِلوقتي عشان دِلوَقتي دفيانَة فِ كنَف راجِل حروف إسمُه علي جبينها و أُمي .. قَبل ما تمَدِّد فِ فَرشِتها طبَعت البوسَة بين عينها و بين عينها و حَتي الدفتَر الناشِع بريحةِ شِعر مَكتوب لي نسيت مين اللي أهدتهولي .. مين هيّ ؟ ! خلاص بالفِعل مَنسيَّة أكيد وَقت امّا يملُكني الحنين و اغرَق فِ موج أمسي مش هرضي أحِّن للحاجَة اللي مُمكِن تِستَفِز دموعي أو نوحي مفيش حاجَة بِتوجَعني فِ ليل البَرد ده فِعلاً سِوي روحي سؤال الليل دُخّان و الوَقت فراغ و الشارِع خيط من توب مقطوع و الموت بيخاف لَيموت مِ الجوع و برَغم إنُّه مُثقَف جدًا ماقراش إتيكيت فَ بيآكُل .. من غير شوكَة و سِكِّينَة النور إنسان مُرهَف و حزين طول عُمرُه بيحلَم بالطيران و ماحَسِّش أبدًا بالجناحين فَ استَسلِم لليل و الأسوار كان نِفسي فِ يوم ما قابِلت الوَحش يكونلي ؟ مساواةِ القِوَّة تعرّي الذات كان مُمكِن اسأل نَفسي ساعِتها بصِدق سؤال ليه الإنسان بيحِب تملّي يكون صيّاد ؟ و بيكره إنُّه يكون صيدَة الحُب المُستحيل بحبِّك بروحي .. و عارِف بإنِّي بعيد عَن فؤادِك و صَعب إنِّي أشرَب خمور سَلسَبيلُه و عارِف بإني مشيت عَ الصراط و ميلت بفؤادي لنيرانِك و عُمري ما كان بإيدي أعدِّلُه ميلُه و عارِف بإني فِ كونِك مُجرَد مُسافِر بِتطوَل دروبُه و ليلُه لِسِت الصبايا هِديت عواصفي نسيمِك كَفيل إنُّه ينجَح فِ عَصفي بَحبِّك بصَمتي .. و عارِف بإنِّي بَعيشِك فِ دُنيا بتحسِب ثواني الوداد اللي بينا و تِغفَل حِساب البعاد و المسافَة بَحبِّك بحِلمي و عارِف بإنِّي هاضُمِّك لحُضني و لَكِن هاضُمِّك كَوهم و خُرافَة مابينا قبايل صحاري و خيل مايقدَرش عاجِز يبِّل الشفايف بتمرَة بتسكُن أعالي النخيل و هايجَة دِمايا و أمواجها مالحها و هَل بَحري مُمكِن يصُّبِك يا نيل ؟ لُقانا هايحصَل .. إذا الشَمس بيِّت فِ أحضانها ليل لُقانا بصعوبتُه بَشوف انُّه مُمكِن مَع ان لعنيكِ الوصول مُستحيل بَحبِّك .. و بينا قصايدي القديمَة قصايدي اللي كانِت لِمحبوبَة غيرِك حبيبتي اللي سافرِت حَبيبتي اللي ضاعِت حَبيبتي اللي كانِت ماهياش حَبيبتي لإنِّي أساساً أساساً أسيرِك إذا بَس تِرجَع شويَة سنيني لأشرَب و اسكَر بخَمرةِ غديرِك و أشرَب و إنتِ كمان تِشربيني و ادوِّب فِ عِطري نسايم عبيرِك بَحبِّك .. و بينا تاريخي القديم بجَرحُه و فَرحُه و رخاءُه و شقاه و بيني و بينِك نداوةِ نسيم و مِيت فَجر دايماً جامِعنا معاه و صوت طير مرَنِّم فِ أحضان سماه مفيش حاجَة ناقصَة .. حياتنا نعيم و بيني و بينِك آلاف الخطاوي و واصلَة مابينا أغاني لحليم بَحبِّك و بينا آلاف الحكاوي و باعدَة مابينا مسافَة و غيم يا خَمرةِ حياتي يا رؤيِّةِ سُباتي يا مالكاني حَتَّي فِ لَحظةِ مماتي مابندَمش أبداً و هافضَل أحبِّك و لَو حَتَّي هاحلَم بِحُبِّك و قَلبِك و يفضَل لُقانا خيال مِش حقيقَة بَحبِّك بِفِطرَة و طفولَة بريئَة و شايفِك بروحي و عُمري ما هاسمَح لعيني تِشوفِك بَحبِّك لأنِّك وَهبتيني ذاتي فِ عِز امّا كُنتِ أسيرَة لِخوفِك بَحبِّك برَغم إنِّي عارِف ظروفِك و سامحيني إنِّي بدون إِذن مِنِّك عِشقتِك و شُفتِك لِفَرحي سبيل بَحبِّك و هافضَل أحبِّك و احبِّك يا نِعمةِ إلهي العظيم الجليل بَحبِّك و عارِف لُقانا هايحصَل إذا الشَمس بيِّت فِ أحضانها ليل لُقانا بصعوبتُه بَشوف انُّه مُمكِن مع ان لعنيكِ الوصول مُستحيل .
