بهية

يسبق كلامنا سلامنا يطوف ع السامعين معنا
عصفور محندق يزقزق كلام موزون و له معني
عن ارض سمرا و قمرا
وضفه و نهر و مراكب
ورفاق مسيرة عسيرة
وصورة حشد ومواكب
ف عيون صبية بهية
عليها الكلمة و المعني
مصر يا امّة يا بهية
يام طرحة و جلابية
الزمن شاب وانت شابة
هو رايح وانت جاية
جايه فوق الصعب ماشية
فات عليكي ليل ومية
واحتمالك هو هو
وابتسامتك هي هي
تضحكي للصبح يصبح
بعد ليلة ومغربية
تطلع الشمس تلاقيكي
معجبانية وصبية
يا بهية
الليل جزاير جزاير يمد البحر يفنيها
والفجر شعلة ح تعلا وعمر الموج ما يطويها
والشط باين مداين عليها الشمس طوافة
ايدك في ايدنا ساعدنا دي مهما الموجة تتعافي
بالعزم ساعة جماعة وبالإنصاف نخطيها
مصر يا امّة يا سفينة
مهما كان البحر عاتي
فلاحينك ملاحينك
يزعقوا للريح يواتي
اللي ع الدفة صنايعي
و اللي ع المجداف زناتي
واللي فوق الصاري شايف
كل ماضي و كل آتي
قدتين و التالته تابتة
اركبي الموجة العفية
توصلي بر السلامة
معجبانية و صبية.. يا بهية
ويعود كلامنا في سلامنا يطوف ع الصحبة حلواني
عصفور محني يغني علي الأفراح ومن تاني
يرمي الغناوي تقاوي تبوس الأرض
تتحني
تفرح
وتطرح
وتسرح
وترجع تاني تتغني
اللي بني مصر كان في الأصل حلواني