الهيئة العامة للفم والأسنان!

احم احم !

- ما شاء الله عليك يا دكتور زي مانت من آخر مرة شوفتك فيها من ييجي اكتر من خمستاشر سنة مفيش حاجة فيك اتغيرت، سواد شعرك، رشاقتك، شياكتك.
- وحضرتك يا أستاذ هشام مفيش حاجة فيك اتغيرت قميصك، نضارتك، كوتشيك!
- ياه يا دكتور فاكر عيادتك القديمة الأولانية لما كنت أجيلك والعيادة فاضية وانت لسه متخرج بتشتكي قلة الزباين؟ وكنت اسلملك بوقي تتعلم فيه وتجرب كل إللي اتعلمته في الكلية، فاكر ولا ناسي يا دوك؟
- مفيش داعي للكلام ده يا استاذ احنا ولاد النهاردة خير حضرتك بتشتكي من إيه؟
- بس الصراحة العيادة الجديدة واو جدا يا دكتور غير القديمة خالص لكن اسمحلي أعاتبك؟
- يا ريت بس لو نأجل العتاب يلاحظ الناس كتير بره
- أيوه يا سيدي ايوه الله يرحم بس اسمحلي برضه اعاتبك بقي معقولة يا دكتور أعرف مكان عيادتك الجديدة بالصدفة وانا إللي كنت الزبون الوحيد في عيادتك القديمة؟
- اعذرني انشغلت بس وريني بوقك أشوف أخبار سنانك.
- اتفضل يا سيدي آدي بوقي كله أهو شوف سناني كلها بعيد عنك بتوجعني.
- يااااه طبعا لازم توجعك دي سنانك متشلفطة جدا جدا!
- خير قلقتني يا دكتور حضرتك شايف إيه؟
- أولا عندك جزء فاضي لازم نعمل فيه كوبري بس قبل الكوبري لازم نمهد الطريق ونعمل عملية برد للسنان إللي قبله وإللي بعده علشان يثبت ومايتهدش!
- اتوكل علي الله يا دكتور واعمل اللازم.
- أيوه بس يعني معلش يا استاذ هشام ويا ريت ماتفهمنيش غلط هو حضرتك عارف تكلفة الكوبري ده كام؟
- لا بصراحة دي أول مرة يتعمل كوبري في بوقي.
- حوالي خمستاشر ألف جنيه !
- كلام إيه ده ر هو حضرتك ناوي تعمل وصلة لكوبري اكتوبر؟
- عايز أفهم حضرتك إن ده شامل المونة والمصنوعية!
- لا لا طبعا يا دكتور معلش انسي الحتة الفاضية دي وشوف فيه إيه تاني في بوقي عايز علاج ما ينفعش يتأجل.
- عندك كمان ضرس العقل إللي من فوق علي وشك الانهيار.
- خلاص إنقذه يا دكتور من فضلك.
- علشان أنقذه محتاج أعمل نفق في جزء معين من اللثة علشان أدخله من تحت وده يكلف حوالي 25 ألف جنيه!
- ليه يا دكتور هو حضرتك حاتعمل وصلة لنفق الأزهر؟
- ما هو التكلفة شاملة تكلفة الحفار الطبي ده إللي ما ينفعش أشتغل من غيره.
- بلاها ضرس العقل وشوف أي حاجة غيره.
- هو فيه هنا نابين بارزين عندك مشوهين اللوك بتاعك محتاجين يشتالوا ونزرع مكانهم اتنين تانين ودول مش أقل من خمسين ألف جنيه علشان أعملك بالمرة هوليود سمايل.
- هوليود سمايل ليه يا دكتور هو أنا حامثل قدام أنجيلينا جولي، سيبهم يمكن أمثل مصاص دماء وشوف أي حاجة رخيصة في بوقي واعملها وخلاص!
- في الحالة دي محتاج أنضف الجير وألمعلك سنانك يعني وش نضافة علي الماشي كده بتاع ستسبعلاف جنيه!
- طب عن إذنك يا دكتور كده واضح إن بوقي محتاج مشوار أروح الحي أو مرفق الفم والأسنان فورا.
- مش فاهم إيه علاقة بوق حضرتك بالحي ؟
- أبدا حاروح أعمله قرار إزالة وارتاح !