خد الفكة وسلملي علي أبو مكة !

احم احم !

انطلقت الزغاريد فجأة من أحد البيوت الفقيرة في قرية فقيرة من قري صعيد مصر الفقير، خرج بقية أهالي القرية يستطلعون الخبر. علي باب البيت من الخارج كانت تقف فتاة ألافرانك كما وصفتها إحدي سيدات القرية »البت بايلنها خواجاية علشان شعرها أصفر ولابسة علي الموضة وبترطن إنجليزي»‬. وبثقة شديدة قالت: »‬هاي إفري بادي» ثم قلبت عربي وقدمت نفسها للجميع قائلة: معاكم فلانة الفلانية مندوبة عن الكابتن محمد صلاح فانطلقت الزغاريد وصاحت نسوة في المدينة: يا مرحب يا مراحب بريحة الحبايب، أهلا بالغالية مندوبة أبو مكة الغالي، خير يا سنيورة إحنا عينينا لابو مكة إللي مصيتنا في العالم كله، إوعي يكون الزفت راموس ده داس له علي طرف تاني ده احنا كنا نروح كلنا نقطعه باسنانا. ابتسمت الفتاة وقالت: أبو مكة باعتلكم السلام وبيقولكم إنه اختار قريتكم علشان يحقق لناسها كل إللي بيحلموا بيه فتبادل الجميع التهاني والتبريكات فها هو إذن العام الذي يغاث فيه الناس وفيه يعصرون بعد تلك السنوات العجاف كيف لا وبابا نويل المصري افتكرهم واختار قريتهم من بين آلاف القري الفقيرة لينقل أهلها نقلة كبيرة؟!.
انطلقت الزغاريد من جديد فراحت الفتاة تقول: يا جماعة أجلوا الفرحة دي لبعدين، حنفرح كلنا ونهيص لغاية لما نشبع خليني بس الأول أقولكم إن أبو مكة كلفني اشوف لو أي بيت فيه عرايس محتاجة تتجهز وهو يقوم بالواجب فتباري الجميع في تسجيل أسماء البنات فسألت سيدة من أهل القرية: طب لو عندي بنتين؟ فردت الفتاة: لحظة اسأل ثم أجرت مكالمة بالإنجليزية طبعا لم يفهم منها الناس شيئا ثم عادت لتقول لهم: مبروك الكابتن وافق حتي لو عروستين في بيت واحد، فسأل رجل جاء يسعي: طب لو تلاتة يا بنتي؟ فكررت الفتاة المكالمة بالإنجليزية أيضا مؤكدة في ردها علي سؤال لماذا لا تكلم الكابتن بالعربي إنه طالما في لندن فهو لا يتحدث العربية أبدا ثم أضافت: الكابتن وافق، خير ربنا كتير وهو عايز يبسط الناس كلها فطلب منها أن يشكر الكابتن من تليفون الفتاة مؤكدا أنه يعرف من الإنجليزية ثانك يو ويريد أن يقولها له بنفسه فاعتذرت قائلة: معلش الكابتن في التمرين دلوقتي وبيوعدكم مرة تانية يكون فاضي يبقي يباركلكم وبيقولكم ادعوله علشان عنده مباريات صعبة خالص في بطولة أوربا فتعالت الدعوات لأبو مكة بالتوفيق علشان عايز يبقي هداف انجلترا!
انتهت الفتاة من إعداد الكشوفات ثم قالت: فاضل حاجة بسيطة فيه مبلغ رمزي 150 جنيه عن كل عروسة مقابل استمارة للاشتراك في جمعية محمد صلاح الخيرية وكل أسرة تشتري استمارات بعدد العرايس وفي ثوان معدودة تم تجميع مبلغ محترم وتسليمه للفتاة التي طلبت إحضار ميكروباص لاصطحاب بعض العرائس أو من ينوب عنهن لسوق الأجهزة الكهربائية في المدينة فتطوع واحد من أهل القرية لديه ميكروباص بالتوصيلة مجانا فلن يكون أبو مكة أكرم منه وطار بهن إلي السوق حيث طلبت الفتاة أن تنزل معها من الميكروباص عروسة واحدة فقط حتي تنتهي من شراء ما يلزمها ثم تستدعي أخري وهكذا حتي لا يحدث لخبطة في المشتريات وبالفعل نزلت أول عروسة بصحبة الفتاة التي استغلت الزحام وزاغت في لمح البصر ليكتشف الجميع أنهم وقعوا ضحية نصابة استغلت اسم أبو مكة وعملتلها قرشين علي الطاير!.
هذه الحكاية حدثت بالفعل في الأقصر ويطلقون عليها تندرا عملية خد الفكة وسلملي علي ابو مكة وقد حكتها لي واحدة من الضحايا وأنا من جهتي أنشرها أولا للتحذير وثانيا لعل مندوبة ابو مكة المزيفة تعود إلي رشدها وتقلع عن النصب. أما ثالثا فأرجو منها عندما تقرأ هذا المقال أن تسأل ابومكة لو حد عنده خمس بنات ينفع يشترك بخمس استمارات؟