سلام ثورة

سلام يا ثورة
وحَشْتينا
في عِزّ ما احنا..
فارقتينا
وكنا لسه هنتحَكَّي
رجعتي من نُصّ السِكَّة
لا لحِقْنا ناخد ولا ندِّي
ولا كان دا عَشَمي
ولا بودِّي
الحلم نصحي عليه ونفوق
وتحت تحت وفوقنا لفوق
هيَّاها هيَّاها الأبعاد
هيَّاها هيَّاها الأوعاد
والضَلْمة والليل متِّفقين
والصبح والفجر علي معاد
ولا حاجة جابت ولا ودِّت
غير لحظة
واللحظة اهي عدِّت
لقيتني واقف في مكاني
وحلمي واخده في أحضاني
وعيني بتطلّ وترتاح
علي بكره..
بكره اهو عدَّا وراح
وادينا لسَّه في امبارح
بظُلمه وظَلامُه البارح
غير بس بدِّلنا التصاوير
ونزلنا نشرب م التحرير
غرقنا في البحر المالح
المنيا