مش ملاك

لساك بتداري
جوه تجاعيد عينيك
أسامي الناس اللي جرحوك
وبتخاف
تنطلق
شياطينك
اللي حبسها في حلمك
ممكن
تطلع في يوم كسبان
وتنام من غير كوابيس
تنطلق حواديت أبوك
اللي مكتفاك في توب الملايكه
عمري ماكنت بخاف من العفاريت
السكاكين اللي في صدرك
كرهت ريحة صبرك
تتخنق من صوابع غيرك
تحبسها
في جسم من سبعة آلاف سنة
صابر ومستني الجنة
اللي زيك مش ملاك
أنت غاوي خسارة
اتعودت علي طعم الجرح
حواديت السلام
بتخدك ل بحر هادي
اتسرق من أمواجه
في أول شهر من زمن النكسه
وعادي أوي...
زيك... مستني الجنة