قصيدتان

يا إمّا كده ياإمّا بلاش
الي فراشتي الجميله ( مارينا )
في أول يوم دراسي
بعد بكره ( حياتي .. )
ه تعمل نيو لوك جديد
وتلبس مريله جديده , وجزمه ,
وشنطه بعجل
وتقولي صباح الخير يابابا
وبوسه فوق خدي
وابتسامه م اللي بتزرع ف القلب
ورده لعمر تاني
بعد بكره ..
ه ابص ع الدنيا بطرف عيني
واعاتبها زي اتنين حبايب
ممكن يزعلوا شويه
بس عمرهم مايفارقوا بعض
وه اقولها فاكره زمان ..
ومريلتي القديمه
وجزمة اخويا اللي داقت عليه
ياإمّا كده ياإمّا بلاش
فاكره ؟
وانا زي مااكون فرحه صغيّره
وسابوها مابين حزنين وحوش
أقل واحد عنده 100 سابقة وجع
ف بيت قديم زي بيتنا ..
بعد بكره ..
طالعه منّه بنت زي القمر
أعرّفك عليها
علشان مايبقالكيش حجّه
أهِه ..
عامله نيولوك جديد
ولابسه مريله جديده , وجزمه ,
وشنطه بعجل
كلاشنكوف
مش جديده ولا حاجه
عادي جداً ..
بحرها دايماً موجه عالي
وعنيها دنيا تانيه انت عارفها
قلبها رقيق بس قاسي
زي شنطة عيّل ف ابتدائي
مليان سندوتشات
وقلام
وكتب
وفجأة بيطلّع منها كلاشنكوف
وبيرسم بالدم شجر
وبالهموم مراجيح
وامنا الغوله حاطه القمر قدامها
ع السفره وبتاكل فيه
عادي جداً ..
من زمان وهي كده
أقل حاجه تفرحها وتنسي اللي فات
وبالمناسبه ..
حزن الليله فقير
وهو ده وقتها ..
هي قالت كلمتين وقت الغضب , وخلاص
إعمل انت عبيط
وكإنك ماسمعتش من كلامها حاجه
وقولها وحشتيني.